تسجيل الدخول

الأحد، 22 أغسطس، 2010

روايـــه الشــلـــه








الغلاف..






.. &روايــــــه&..


@..رحلنا وباقي الذكرى..@




(..بنات الطائف..)






خلف أسوار المدارس أروع روايات الاخوه والصداقة الصادقة




................................................












بقلم:




Wafa alshehri*







بين أمواج الحياة تتهافت روايات البشر..بين الخيال


والواقع بين الذكرى والنسيان...


وتبقى رواية الصداقة شامخة على قارب النجاة...


لاتحركها الرياح اوتزلزلها الظروف ورغم تدافع


الأمواج عليها وشده الرياح إلا أنها تبقى


((هي الرواية الحقيقية))


ورغم أنهم ينظرون لها كأسطورة تحكى من قديم


الزمان وكأنها لم تعد موجودة إلا في الحكايات


رغم هذا وذاك....


((تبقى الصداقة هي الحب الحقيقي))
















خلف اسوار مدرستنا احداث قريبه من الخيال


ايام ومواقف ولا اروع...في الابتدائي والمتوسط والثانوي


صديقات يعرفون معنى الصداقه...


وايام كل يوم احلى من الثاني...


ومواقف ماكنا نتوقعها...


.....................................................


من ايام الابتدائي (العريفه"1") هيه الي نحب انها تكون صديقتنا


وبنت الابله على العين والراس مانقدر نقول لها شي...


ومواقفنا تحمل نوع من التخلف اللي يموت من الضحك


وافضل لعبه هيه(المطارده)اللي نسميها شرعه..


طبعا بنت الابله إذا زاعلت بنت لاااااازم كلنا نزاعلها


.............................................................


اما ايام المتوسط دايم تكون على قسمين اولى متوسط قسم لحاله


وثالث وثاني قسم لحاله....


دايم اولى متوسط نحب نسوي اننا كبااار وهذا اهم شي


وبحكم ان الزحمه المشتركات في الاذاعه وفي الحفلات شديده


في الابتدائي...فنعوض انفسنا بأذاعات المتوسط لان المتوسط


مااحد يبغى يسوي اذاعه بس اولى متوسط هم اللي رازين انفسه


في كل حفل وفي كل أذاعه....أما عن القسم الثاني اللي هوة


(ثالث متوسط وثاني متوسط) فكنا نعيش في المرحلة هذي


انواع الهستره ..واللعبة السائدة هيه (عريس وعروسه) طبعا لازم وحده تسوي انها المصوره والثانيه ام العريس والثالثه أم العروسه


وإذا كثروا الحضور مافي مشكله واللي تبغى تسير أخت العروسة


بعد مافي مشكله ..المهم يطلع الزواج على أكمل وجه


أما عن تجنين الابلات فيكون بشكل محزن يتلف له القلب وتصدئ شرايينه وأوردته..لان الموضة هذي (موضة تجنين الابلات)


توها جديدة في المتوسط صح في الابتدائي كنا نجننهم بس بطريقه غير مقصوده يعني ماقد جربنا نجننهم بطريقه مقصوده وننبسط إذا عصبو..للاستفسار عن طرق التجنين (يرجى زياره موقع مدرسه المتوسط وسؤال الابلات بأنفسهم ليجيبونكم)


........................................................


أما هستره الثانوي تكون ناتجة عن خبره وتجربه..يعني ماجينا للثنوي إلا إحنا خبره في الشردات والمشاكل وكيفيه التعامل مع الوالدة لو اتصلوا عليها الاداره..وطرق السلامة من اتصالاتهم على الوالده(مثل فصل التلفون قبل الخروج من المنزل..أول كتم نغمه التلفون..اواعطاء الاداره رقم بيت غلط بس تكونين واثقة إن أهل هذا البيت دايم مايردون على تلفونهم..الخ)فلذالك نرجع لطرق الترفيه وصنع المشاكل بأساليب جديدة ومشوقه غير اللي جربنها


في المراحل السابقة..مثل (لما يدق جرس الصرفة نرمي الشنط من الدور الثالث إلى الدور الأول وعدد الشنط موهين يعني مايقارب 15شنطه ولابعد الابلات والمديرة والبنات كلهم في الدور الأول عيني عينك ..يعني مثل اللي يقول أش رايكم فينا ؟؟ خخخ


وللعلم داومنا اسبوع كامل بدون شنط ..لان الاداره اخذت شنطنا ..وإحنا مسوين عناد مانجيب شنط...


او نشرد لاكن نشرد واحنا عارفين انهم بيمسكوننا يعني شله رجه مع شله فش فاش بجميع أعضائها معقولة ماراح يفقدوننا في الدرج


اصواتنا يسمعها الأصم عاد يوم جو كفشونا وجو ياخذوننا مثل الجوازات يوم تلاحق التكارنه اللي بدون أقامه....أو مثل يوم نجيب دافور صغيروبراد ونسوي لنا شاي في آخر الفصل ومشت السالفة اليوم الأول أما اليوم الثاني عاد زودناها جايبين القدر والرز وناوين نسوي الغداء في المدرسه المهم ان الاداره لحقت علينا في اللحظات الاخيره ولا كنا بنسوي غداء ولا أحلى وكفشو العزبة اللي مسوينها بآخر الفصل كأنها عزبة بنقاليه..أو مثل اللعب بطفايات الحريق هذي اللعبة لعبناها لحد ماطفشنا لدرجه أننا في ثالث ثانوي سرنا يوم نمر من عند الطفايات تشرد<<وحده كذابة.. لا بس ثالث ثانوي سرنا طفشانين من اللعبة ذي حتى اني اذكر أننا مالعبناها في ثالث سارت قديمه.. أو إذا نسيو الدرج حق المايكرفون مفتوح ياويلهم منا خخخ تسمعين أصواتنا ماتنقطع لحد ماندري ان في أبله جات هذا إذ ماخربناه...أو نقوم بتنفيذ الخطط السرية اللي لو دخلتي الشلة كلها في السالفة 100% راح تنفضحين خخ مثل تنفيذ خطه تنسيم كفر المديرة وتمت العملية بنجاح ....أو مثل في أولى ثانوي بعد العيد جبنا طراطيع ولعبنا فيها الشلتين(رجه بس رزة وشله فش فاش) وتركنا نصها للباص نرميها مع طاقه الباص وهوه يمشي ههه انوااااع التهور.. أو مثل فكره الفطور مع بعض إذا كان عندنا فتره واحده في الاختبارات... عاد شوفو البيت اللي نروح له تلاقين أنواع المداهمات لأصحاب البيت تنظر هناك تجد طفل يبكي بعد أن تمت عمليه مداهمته وتنظر هناك إذا بأخت تشرد خوفا من مداهمتها وهي لم تلبس بعد..وهناك ثلاجة تشكي حالها بعد أن فتحت مليون مره..وهناك طاوله ترتجف بعد أن تم الدق والتطبيل عليها خخخ انوااااااااااع الفساد الاجتماعي..والكثير الكثير من مواقفنا المجنوووونه) المهم إن في المرحلة الثانوية الاداره هذي ماعاد تخوفنا أبدا هههههه المهم طولت وأنا باقي ماتكلمت عن أعضاء وأفراد الرواية طبعا قبل كل شي إحنا شلتين تعرفنا على بعض عن طريق الفله وفليناها دايما نتضارب مع بعض عاد ماراح أقول مين اللي دايم يخسر علشان متسير مشاكل ....... بس بالنسبة للشكل الظاهري للشلتين شله (رجه بس رزة) يغلب على أعضاء هذي الشلة الطول ولما أقول الطول يعني أنهم ماهم وحده وحده طوال لكن الطول (فرض كفاية)إذا توفر في الاغلبيه سقط عن الباقين عندهم مهارة في المضاربة عجيبة لاإله إلا الله أما شله(فش فاش) فيغلب على هذه الشلة القصر وقصرهم نفس الشئ(إذا توفر في الاغلبيه سقط عن الباقين..وعندهم مهارة في الدق والطبل عجييييبه ماشاء الله ..ومع الزمن اصبحو من هواه المضاربة ... وذلحين راح ندخل في شخصيات وأفراد الرواية ونبداء بأول عضوه في أفراد شله(رجه بس رزة)..

ابتهاج الشهري: أو بهجة أو ابوعلوك..وتسمى بابو علوك لشده عشقها للعلوك وانهماكها في مضغها خخخخ أول يوم في صف سادس ابتدائي جاتنا بنت جديدة جالسه في آخر الفصل عيونها كبااار مشاء الله ومفتحتها فينا ..المهم اقترحت عليه جمانه أننا نتعرف عليها وتعرفنا عليها وقالت لنا ان اسمها ابتهاج ومن يوم ماتعرفنا عليها والبنت ناقزه تلعب ولابعد تقول لنا تروني اعرف أطبل وورتنا طبلها بسم الله اعرف الناس أول يوم في الدارسة يكونون هاجدين خاصة إذا كانوا توهم في مدرسه جديدة وتوهم متعرفين على البنات بس هذي حاله شاذة مشاء الله... المهم مع الأيام نقولها للفصل الثاني (مالي حظ فيها) بس جات كلمتني تقول تبغاني انتظرها في الصرفة علشان نمشي سوى لأننا نرجع لبيوتنا مشي المهم سولفت مع ذا البنت إلا تفكيرها نفس تفكيري<<امحق من تفكير خخخ..بس طلعنا نتشابه في أشياء كثيرة شويه شويه سرنا نغامر سوى ..يعني سرنا نمر البقاله واحنا صغار ونشتري منها آيسكريم (اللي يجي خمس حبات بريال) وناكله في الطريق..المهم صجيت أمي وابتهاج صجت أمها إلا بنخليهم يتعرفون على بعض ووالله تعرفوا على بعض وسارو يعزمون بعض من غير مايقولون لنا حركات..المهم نرجع لشخصيه بهجة ..ابتهاج بااااارده بس مو أكثر مني على قولتها على الرغم من انها تسوي شخصيه وعندها عزه نفس إلا انها من جوى طييييبه...وهيه من النوع اللي يحب المشاكل <<الله يكفينا شرها أما عن الاستهبال فهوة روح قلبها يعني ابتهاج بدون الاستهبال ماتعيش تستهبل في كل شي(في الرقص..في السوالف..في النظرات..على البنات..على الابلات..الخ)يعني أتذكر كان فيه بنت من اولى متوسط وإحنا يمكن كنا ثاني ثانوي كانت البنت جالسه في حال نفسها وهاديه وحاطه فسحتها جنبها وتجيك ابتهاج ام الاستهبال طبعا بعد تحدي ..وتنقز على فسحه البنت وتخطفها..... البنت نشف دمها وطالعت في ابتهاج بحقد..عاد ابتهاج طالعت فيها بابتسامه مستهبله وتشدقت في وجهها ورجعت فسحتها طبعا إحنا ميتين من الضحك لان الموقف ماله غرض إلا الاستهبال والبنت مررره مانمون عليها ولا نعرفها خخخ وبعد في ثالث متوسط إحنا والشلة رجينا المدرسة المهم إن الاداره طلبت مننا نسوي إذاعة ورح يسامحوننا على اللي سويناه المهم بداية الاذاعه مسكت المايكروفون وقرات وأنا اقرأ ابتهاج استهبلت مااذكر وش سوت المهم اني ضحكت في الاذاعه ومشى الموضوع لانني ماطولت الضحكة عاد ابتهاج بعدي مسكت المايكروفون وطولت الضحكة فضحتنا عاد بعدها الابلات دخلو عندنا وهزؤونا عل ذا الاذاعه يعني مستحيل يجي مننا خير هههه ..رغم هذا وذاك تبقى ابتهاج حقت فزعات<< ارررررحم...يعني في المشاكل اللي نسويها تكون جنبي ولا يهونون أعضاء الشلة الباقين كلهم مايقصرون..ولو اني أنكبها أحيانا بأفكاري مثل يوم طلعنا أولى متوسط كنا نبغى نسوي فيها اننا كبار ونقص لنا قصص بس ام ابتهاج رافضه ان ابتهاج تقص أي شعره من شعرها..عاد بدوري كناصحه قلت لها قصيها بدون ماتدري أمك وهيه بتشوفها وتعطيك كلمتين وانتهينا عاد ابتهاج نفذت الخطه بحذاريفها وامها ما انتبهت للقصه ابتهاج رايحه جايه من عند أمها تبغاها تشوف قصتها وتهزئها وترتاح وأمها مررره ماهي معطيتها وجه آخر شي البنت اقبلت على الانتحار وداهمت امها في المطبخ وقالت لها أمي اش رايك في قصتي<<<اوووه يابهجه عاد مو كذا ههه على طول ردت امها وقالت لها(عسى الله يقص رقبتك خخخ)وبعدها اصبحت ابتهاج تستمتع بقصه من افضل القصص في المدارس هههه طبعا بفضل الله ثم فضلي احم احم.. والآن نبحر مع هبال الأخت سيرين المالكي: هذي البنت دائما نقول أنا وأيها إن أبونا واحد بس يستهبل علشان كلهم اسمهم سعيد.. وهي حاصلة على جائزة نوبل للطول العالمي مشاء الله..سيرين من الابتدائي مهستره يعني الاخت جايبه معها صفيرا لعبه ووسط حصة أبله مريم يرتفع صوووت الصافره التفتت ابله مريم في سيرين وقالت خير ياسيرين ردت سيرين(ابغى الفسحة تجي ههه من جد حل)أما عن شخصيتها ..فهيه عصبييييه رغم انها تحاول تظهر لنا انها ماتعصب والله عني أنا اموووت وانرفزها فللله حتى الشلة الكريمه يحبون ينرفزونها بس قبل ماننرفزها لازم نتخذ ادوات السلامة يعني ممكن لو كان وجهك قريب تاكلين لك كف ولا ينسحب شعرك المهم من هذا الشي غير انها عصبيه تحب المغامرات يعني بس تجي على بالي فكره حتى لو انها خياليه اعرضها لها تأيدها بشده مثل(يوم كان فيه حفل للأمهات جاتنا فكره أننا نلبس عبايات وانقبه ونسوي انفسنا حريم وناخذ ابتسام الفيفي على انها بنتي وسيرين تاخذ بدريه العصيمي وبمساعده من الشلتين قامت الفكرة على أكمل وجه والله فللله أو مثل فكره تنسيم كفر سيارة المديرة لأنها كانت تدخلها لوسط الحوش الخارجي حق المدرسة طبعا سيرين أطال الله في عمرها تكفلت بالموضوع وكانت بطله هذي المغامرة وعبينا جيبها بنس عاد احنا قلنا بنراقب ومن أهم النقاط في المغامرة تغيير اسم سيرين من سيرين إلى مريم.."عللي" <<علشان لوشافتنا ابله ولا بنت ولا أي احد ننادي سيرين ونخليها تشرد فصعبه نناديها باسمها خفنا يعرفونها..ومثل فكره الدافور طبعا الفكره ذي مو سيرين بس اللي قامت بها لأكنها من ضمن اللذين قامو بتنفيذها على أكمل وجه..الخ)ولا أنكر انها تحب المشاكل مثل باقي الشلة ..والأحلى إني لما أروح معها الاداره على مشكله أو شي تكون هيه في وجه المدفع يعني أحس عين الابلات عليها يتفاهمون معها هيه وأنا جنبها ساااكته وكأني ماسويت شي <<يمكن عشانها طويلة..يعني مثل سالفة(خالتي سبيشه)<<أي خالتي سبيكة بس باللهجة الكويتية كنا نسمي أبله نوره حقت الفني خالتي سبيشه لدرجه انها سارت إذا سمعت الكلمه ذي يرتفع ضغطها 200 عاد ماتحملت هذا الشي وأخذتنا وودتنا الاداره على طووول أول مامسكونا أنا وسيرين أحسهم طايحين فيها هيه يسالونها أنا منسحبه من الموضوع خخخ أما بالنسبة للحالة الاجتماعية لها فهيه مخطوبه الآن بس يمكن على بال مااخلص من كتابه الرواية نلاقيها متزوجه ومعها عيال ..طبعا في ملكتها كان أول استهبال لي في الرقص يعني أول مره ارقص زي كذا أحس إني مبسوووطه معاد جلست عاد تجمعوا لشله على ملكتها وإحنا عندها في الغرفة البنت تستهبل وترقص رقص تريقه وإحنا معها عاد لما نطلع من الغرفة حقتها تقول كلمتها المعتادة(والله لو إني كلب)<<والمقصود بهذي الكلمة إن البنت هذي عندها نظريه إن اللي يقعد لحاله كأنه كلب ..نسيت اقول شي ماانكر ان شخصيه سيرين قويه بس أنا ماحبيت اقول لها علشان ماتستقوي زيادة عليه..المهم الله يوفقها وإنشاء الله نحضر زواجها ونفرح لها... اوووه ذلحين ندخل في عالم الاستهبال مع أسماء الهبيلي:هذي البنت كتله متحركة من الاستهبال والجنااان عندها طيبه فووووق الخيال بس مشكلتها مررره على نياتها يعني أي مقلب يجي على بالي سواء سخيف أو قوي أو مكشوف أسويه عليها ويمشي مثل(مره في الحصة كنا نأكل فصفص المهم الأخت نشب في حلقها القشر حقه وبلعت وكل شوي تبلع في ذا القشر قامت تقول لي لايكون قشر الفصفص إذ أكلته مضر الله يستر قلت لها:يوووه يا أسماء يقولون إن بطنك ينتفخ خخ<<بالله هذا كلام يتصدق المهم البنت صدقت إن بطنها بينتفخ قالت وش اسوي قلت لها:خذي شاي وحطي معه ليمون عاد خرفت لها خلطه من راسي حتى البقرة ماتشربها المهم البنت راحت لبيتهم وسوت الخلطة وطاحت شرب فيها هههه بعدين قلت لها انه مقلب..ومره من المرات الأخت أسماء تبغى تسوي انها حقت مقالب جابت كيس صغير حق حلاوة النسكافيه وحطت جواه صرصور مدري كيف قبضت عليه المهم وأعطت الحلاوة لابتهاج وقالت كليها في البيت يعني مقلب سااامج اليوم الثاني سألتني أسماء قالت اش سار على ابتهاج قلت لها تخيلي قالت لي إن أخوها مهند الصغير اخذ الحلاوة واكلها شكل ابتهاج ماتدري إن فيها صرصور <<طبعا أنا متفقه مع ابتهاج..المهم قلت لها ابتهاج تقول إن أخوها مهند مرض ومايدرون وش فيه وهوة في المستشفى طبعا من شده النباهة اللي تمتاز بها أسماء صدقت والبنت حزييينه وتقول كيف اقول لابتهاج المهم إن المقلب طول وهيه مصدقه بعدين قلنا لها انه مقلب علشان ثاني مره تخلي مقالبها التافهة..أما عن شخصيتها فهي إنسانه طيوبه ومرجوووووجه ولها مميزات وهي انها تدخل في الفين مشكله وتطلع منها زي الشعرة من العجينة (وعلى نياتهم يرزقون) لدرجه إننا سرنا نقول إن أسماء تقراء الاذكار كامله يعني لو تلفين معها المدرسه كامله وانتي شارده مايكشفونك مشاء الله عليها.. تسمى عوازم او ياويلي ويلاه<<لانها دايم تقول هذي الكلمه ...والله من كثر بلاويها...ههه نسيت اقول ميزه في اسماء * بالنسبه لي إذا عندي أي استفسار عن الاسواق على طوووول أسأل أسماء يعني تعرف كل شي عن الاسواق مثل(إذا فتحت المهرجانات التسوقيه...او إذا تخفضت الماركات..او إذا فتح سوق جديد) طبعا اسماء اخذت اثم في ابويه لانها هيه اللي تعطيني التعليمات...وترى اسماء خوااافه بس عاد مو اكثر من مزنه لان اسماء تسوي نفسها انها شجاعه... اما بالنسبه لشنطتها فهي اشغلت تفكيري لاني من يوم عرفت اسماء وشنطتها تحوي قمايم مال امها داعي مثل(كسره شباصه مكسوره..وربطه..غطى عطر..شمعه صغيره مكسوره..اوراق منوعه في كل ورقه سالفه _ورقه فيها خلطه للشعر-وورقه صغيره فيها دعاء مدري من وين جايبته-وورقه فيها جدول اخذناه بدااايه السنه وقد غيروه من اول ما اعطونا وماعاد احد يمشي عليه ) هذي اسماء اللي جننتنا باستهبالها وبتقليبها للكلام والحروف وبهسترتها اللي تضيف للشله نوع من جو الرجه والفله والجنان... اما فوزيه الحارثي:اول شي اتكلم عنه في فوزيه عن يديها اللي سمينها زنوبات لشده اثرها في الضرب ولانها تترك اثر في الدماغ ... مشاء الله تبارك الله.. يعني امزح مع فوزيه وارفع ضغطها واتلقف عليها لحد ماتهددني بزنوباتها على طول اهجد...وهذي البنت تعجبني تريقتها.. بس لما نرجع للماضي العريق لفوزيه نلاقيها كانت تعاني مني خخخ يعني في ايام الابتدائي كنت اتحكم فيها على كيف كيفي اتذكر مره الابله في ثاني ابتدائي وزعت بطائق صغيره نعلقها على الصدر مكتوب فيها(ممتازه)اللي اتذكره اني اخذت حقت فوزيه ولاقدرت تقول لي شي ..واشياء كثيره كنت اسويها لها ولاتقول لي أي شي لانها تخاف مني خخخ<<انا ماكنت ادري انها في المستقبل بتنمو النمو هذا وتصبح تستمتع بطول عظيم ويدين باطشه –مشاء الله- ولا كان ماسويت لها شي ... بس في سادس ابتدائي تحسنت العلاقه واصبحت فوزيه مستقله بشخصيتها فظهر الابداع العظيم(مسرحيه المدام والخادمه) كانت العريفه –مها-تجلس الفصل ونقوم إحنا نسوي هذي المسرحيه طبعا بدون تدريب يعني نتكلم من رووسنا –كانت فوزيه هيه المدام وانا وللأسف اقوم بدور الخادمه<<وضعت في هذا الدور من شده اتقاني له مو علشان شي....... المدام تنادي:ميري تجي الخادمه:نعم ماما المدام:كنسي البيت الخادمه:طيب ماما وتروح كانها تكنس البيت ..بعدين ترجع وتقول :ماما المكنسه طلعت نار وخرب المدام:تصيييح المدام وااااو الله اكبرعليك المكنسه انحرقت(طبعا هنا الفصل يكون في حاله هستيريه من الضحك –والله نفسي ان فيه احد يصورهم) المدام:ميري طيب روحي غسلي المواعين الخادمه:طيب..-وتروح كانها تغسل المواعين- بعدين ترجع وتقول:ماما 4صحون و6فناجيل كلو كسر(عاد الفصل يموتون ضحك) ..ليت شخصيه فوزيه مااستقلت شخصيتها ماطلعت لنا إلا ذا السماجات<<احطها في راسها الشي الثاني فوزيه تتميز بصوت جهوري رائع خخخ كنا في حصه التعبير ندرس الخطبه وانه من شروط الخطيب ان يكون صوته عالي وجهور ..عاد فوزيه تاخذ الموضوع بجديه على ان صوتها خلقه جهوري تقوم تصيح باعلى صوتها وتقراء الخطبه-من جد تقراء بامانه-ههههه احيانا يوسوس الشيطان لفوزيه وتقوم تنشد او تغني – طبعا اول المتضررين مزنه خخ-خاصه انشوده إلا صلاتي..وإذا بكت الله يستر علينا يدرون اهل الطايف كلهم ان فيه بنت تبكي خخخخ-ورغم هذا وذاك تخيلو معي هذا الموقف المدمر في ثالث متوسط كانت هيه عريفتنا<<لاتعليق اما في الثانوي ..طبعا إذا خططنا لشي من خططنا احنا والشله اول الناصحين هيه فوزيه يعني تنشب لنا (يابنات تخيلو يمسكوننا الاداره-يابنات تخيلويدقون على امهاتنا-وإذا اضطرت احيانا تحرم هذا الشي خخ) بس احلى مافي شلتنا مايفكونها لحد ماتدخل معنا في السالفه... بعد فوزيه نجي لبشاير الشريف:نفس الحاله اتحطم إذا جيت جنب بشاير مشاء الله الاخت طووويله.. بس احلى مافيها إذا ارسلناها المقصف ماتاخذ دقايق إلا هيه راجعه مشاء الله..مدري يمكن علشان يديها طويله..على فكره بشاير على نياتها بقوه ..واللي يميزها علاقاتها بالناس احسها مشاء الله تعرف كل المدرسه ولا مو بس تعرفهم إلا تمون عليهم وتمون على كل الابلات هيه الوحيده اللي من شلتنا لها قبول عند الابلات مع انها تهيص معنا بس عندها اسلوب مع الابلات... في سادس ابتدائي كانت تجلس هيه وسيرين في آخر الفصل وطبعا من باب الموانه اخذت الكرسي حقي ورجعت معهم ورى جلسوني في النص وسوالف وفله على كيف كيفك بس انا اش جاني اجي بينهم كلهم طوال وانا في النص...ميه وواحد خخخ نسييت اقول لكم شي مهم اكتشفته في بشاير اثناء كتابتي للروايه...البنت هذي نكدت عليه ام الروايه !!! يعني كنت اكتب هذي الروايه وانا مروقه وفي احسن حال ومانقصني إلا شوفتكم..ولما وصلت عند بشاير طاااااحت على راسي كل البلاوي خخخخ لما وصلت عند كلمه (ميه وواحد) اللي انا كاتبتها فوق قالت لي امي طفي الكمبيوتر وتعالي العشاء المهم بحكم اني كنت اشتغل على الحاسب الكبير(اقصد المكتبي) ماطفيت الكمبيوتر بس طفيت الشاشه ورحت للعشاء لما رجعت من العشاء مدري مين اللي مر من عند الكمبيوتر وقال بيسوي خير وفصله من الفيش !!! طبعا لما فتحته لقيت الجزء اللي كتبته عن بشاير انمسحه كله قهررررر طبعا حسيت بالقهر وتكسلت اني ارجع اكتب وبعد فتره رجعت وقلت باكمل الروايه لما رجعت لقيت الكمبيوتر ماعاد يكتب إلا انقلش اوووووه يلعن ام القهر لقطت وجهي ورحت ورجعت للروايه في شهر رمضان وقلت باكملها لما تروح اختي على اللاب توب حقها علشان اخذ راحتي لما جاء اللاب توب حقها وقلت اكيييد ذلحين باقدر اكملها على راحتي رحت اخذت لي عصير(فمتو)من المطبخ وجلست عند الكمبيوتر وانا حاطه العصير جنب لوحه المفاتيح طبعا من الرجه كبيت العصير على لوحه المفاتيح !!! انعدمت الدنيا كلها وخرب الكمبيوتر ..اكيييد طفشتو >>>بس باكمل علشان تحسون فيني

المهم بعد ماصلحت الكمبيوتر رجعت للروايه وقلت باكملها ايييييييش ساااااار؟؟؟؟؟

برنامج الوورد خربااااان عندي يعني ماعاد يكتب اي اضافه للروايه ...قمت نسخت اللي كتبته في الروايه في رساله مسوده في ماسنجري ورحت فتحت الماسنجر من اللاب توب وذلحين قاعده اكمل لكم الروايه منه...



هاااااه بالله ماهي بشاير وجه شر على الروايه ههههههههههه

مع ان البنت هذي تقدرون تقولون ماهي نكديه ابدا>>>نرجع لشخصيه بشاير

من جد ماتحمل اي نوع من النكد يعني إذا اتفقنا نسوي شي ماتنكد علينا ابدا ..مو زي بعض الناس>>اقصد فوزيه

يعني كون ان بشاير نشبت لي في الروايه هذا شي غريب منها الله يهديها ههه>>وحده صدقت ان بشاير هيه السبب

المهم نسيت شي في بشاير هذي البنت إذا زعلت ولا عصبت علىىىىىىى طووووول يبان في وجهها

لانها يسير احمر بس بصراحه نادرا ماتزعلا او تعصب وهذي نعمه من الله.. عاد كفايه عندنا سيرين امبراطوره في العصبيه

المهم...بشاير ذلحين على وجه زواج واسئل الله انه يوفقها ونشوف عيال عيال عيالها....









بعد بشاير ننتقل لشخصيه ((مها الحارثي:

في اول لقاء لك مع مها تحس انها بنت انتيكا على قولتهم وان اسلوبها ذوووق معك <<يعني باختصار تعرف تتميلح بوجيه الناس...يعني تعطيك من ذا الكلام وتسلمين ياقمر ومشكوره ياعسل اماااااا في الحقيقه فهيه عكس هذا ههههه.....يعني مها مايقدر الواحد يحكم عليها من اول لقاء ولا من اول جلسه معها ...بس انا باتكلم عن شخصيتها ..مها رغم العناد اللي تتميز فيه إلا ان في قلبها طيبه ورحمه كبيرره واماااا إذا جينا عند ((تصفيه الحقوق على قولهم)) فهيه إذا لها حق عندك باتخذه يعني بتاخذه حتى لو تجي تصحيك من النوم علشان تاخذ حقها منك ههههه يعني الميراث اللي بتاخذه من أي احد ان شاء الله مايضيع خخخ ...اما عن دموعها فهيه قبل ماتبكي تجدها تبتسم لحد ماتنزل دموعها وهيه تبتسم يعني ترقعها مسويه يعنني قويه ومابكيت ههه طبعا مها كانت عريفتنا في ثالث ابتدائي وكانت من افضل الصديقات لي في ثالث ابتدائي <<طبعا تعرفون صداقات الابتدائي يومين اصحاب وثلاثه ايام متزاعلين وهكذا طبعا الايام اللي نتخاصم فيها انا ومها ينقسم الفصل قسمين شيعه وسنه خخخخ اقصد قسم في صفي وقسم في صفها إلا ان يفرجها ربي وربكم... ولا شوفو القهر حتى في سادس وفي اولى متوسط كانت هيه عريفتنا مدري وش يحسون فيه الابلات يوم يختارونها هيه دايما <<انا باقي مقهوره خخخ عاد شوفو انواااع الغرور اللي تسويه إذا قامت عريفه ماتتكلم إلا من راس خشمها وتطالعنا بنص عين وطبعا حركتها المعروفه لما ترمي كلمه على وحده منا تكون ماسكه ضفيره شعرها من آخرها وترميها ورى ظهرها بغرور وتلف على الصبوره تكتب <<كاني اشوفها قدامي ذلحين هههه....طبعا في اولى متوسط كانت سيرين نااااشبه لها كل ماقمت عريفه تمشكلت معها وعاد انا المعاون لسيرين نقعد نضحك ونستهبل نبي نرفع ضغطها زي مارفعت ضغوطنا ...اما في الثانوي مها صجتنا إلا ان صوتها حلو وانها بتغني لنا واننا بنسمع لها وتجي تغني لنا اغنيه ((ولا تزعل ولاتتعب شعورك..))والبنت مررره معجبه بصوتها وفي وسط غرورها ظهرت لها المنافسه الوحيده والعندليبه فوزيه الحارثي <<فوزيه ارتفع ضغطها وقالت لمها والله اني لو اغني يا صوتي يطلع احلى من صوتك واستمر النزاع فتره من الزمن حتى اتفقت الشله للذهاب ل(ساميه المالكي) وقالو لها بنخليك الحكم عليهم طبعا اخترنا ساميه لانها افضل شخصيه دينيه في الشله ولا نزكي على الله احدا ههه المهم انهم اجتمعو اصحاب الحناجر الذهبيه وقامو يعطون ساميه مواويلهم وغنو لها اغنيه((ولاتزعل)) وفي الاخير حكمت لهم بان --فوزيه تضبط اللحن <<يعني ساميه قصدها ان الصوت معدوم خخخخ --ومها صوتها حلو بس تلعب في اللحن <<زي مشاكل الدقاقات دايما يلعبون في اللحن خخخخخ المهم كل اللي قاعد يسير من عنااااااد مها هيه إذا اصرت على شيء لازم تطلعه انه هوه صح هههه وهذي هيه شخصيه مها اللي تحمل بين طياتها الطيبه والعناد والمجامله والضحك وكل شي هههه بعد مها ننتقل لشخصيه ((نوره الغشمري)) طبعا ما احد يسميها في الشله نوره لازم نقولها نوره الغشمري لان فيه عندنا نورتين في الشله... المهم نوره الغشمري هيه الوحيده اللي طلعت من شلتنا فيها نعومه فلذالك سميت ب((نعومي)) ونعومي هو محل للملابس المشخلعه الاتي يلبسنها الفتيات المتزوجات خخ <<هذا تعريف للمحل في شلتنا هههههه لاكن احنا سمينا نوره نعومي مو علشان الملابس اللي فيه بس علشان اسمه..<,وللمعلوميه يرتفع ضغطها من الاسم ذا مع انه محترم بالنسبه لباقي اسماء الشله هههه المهم نرجع لشخصيه نوره الغشمري<<نوره انسانه بااارده من الدرجه الاولى يعني ماشاء الله عليها اعصابها مسترخيه على طووول وهيه دايما يوم نقول لها انها فيها نعومه تقول ((ترى اللي فيني برود مو نعومه)) ههه ونوره مستحيل تفهمينها من اول جلسه لك معها لاننا لو بنحكم عليها من اول جلسه لنا معها بننغر فيها وبنقول انها انسانه مالها لايد ولا رجل في الرجه والمقالب وانها ماتحب العناد ولا المضاربه ولا الجنان ....وهي طبعا عكس هذا كله يعني باختصار هيه سوووووسه من تحت لتحت ماحد يعرف اللي في راسها إلا إذا عاشرها ..يعني في بعض المواقف والمغامرات تعطينا هيه الفكره وتؤيدها وتقوم بها معنا على اكمل وجه والشيء اللي الاحظه ان نوره إذا تناشبت في مشكله او على راي هيه ومها ماعاد يفك بينهم شيء احس انهم إذا اختلفو في الراي يطلعون كلهم عنيداااااات ويرفعون الضغط حتى إذا تضاربو تلاقون نوره ماتفك مها لحد ماتخذ حقها منها ومها عاد مايحتاج ماشاء الله عليهم وبعد خمس دقايق تلاقيهم يضحكون على مضاربتهم هذا إذا ماضحكو في نص المضاربه <<يعني السالفه تحدي وعناد هههههه ومن المواقف اللي اذكرها سارت في الثانوي انه في يوم من الايام واحنا اولى ثانوي لقينا رساله حب في شنطه نوره الغشمري طبعا البنات يحبون يلعبون على اولى ثانوي شايفين انهم توهم جايين من المتوسط وانهم هبل ...الخ طبعا إحنا ننتظر اللحظه اللي تجي فيها وحده تستهبل علينا فيها ولقينا ذا الرساله من وحده اسمها((مشاعل )) المهم إننا خططنا على خطه ممتازه وناجحه وقمنا بتنفيذها في الساحه والخطه هيه اننا في البدايه يروحون ثنتين منا ينادون البنت لحالها ويقولون لها نبغى نكلمك شويه طبعا رحت لها انا وابتهاج والبنت جات معنا لحالها على بالها اننا بس ثنتين وبنتفاهم على قولتنا طبعا الشله يراقبوننا من على بعد مع نوره الغشمري واول مابدينا نتكلم مع البنت إلا ويجيك هجوم الجيش السعودي تخيلو شكل البنت لحالها ومتجمعين عليها 15 نفر خخخ سارت وهيه تتفاهم معنا تقول:خير ليش متجمعين كلكم طبعا والعبره تخنقها وقمنا نتكلم معها ونقول :ايش لقفك ومن سمحلك تفتحين شنطه نوره طبعا البنت فهمت اننا نبي نظربها من التجمع اللي سويناها وإحنا مو هذا قصدنا احنا نسعى إلى التخويف اولا ثم إذا احتجنا للظرب يسير خير هههه وفعلا سار اللي خططنا له تجمعو البنات وقامو يطالعون في المشكله لاااااااا وآخر شيء يفكون بيننا ويقولون خلاص حصل خير كل وحده تروح المهم فكينا المشكله وانتهت ....بس ترى رغم اللي سويناه قلوبنا طيبه خخخ يعني البنت بعد السالفه ذي بسنه مات جدها الله يرحمه قمنا رحنا لها كلنا ونادينها طبعا البنت قالت يالله عسى خير ذلحين وش يبغون ذولا ؟؟ يوم ناديناها عزيناها وسلمنا ورحنا احس البنت تطلع في راسها علامه اللنبه <<اللي تعني التعجب بس ذيك المشكله كاااانت قمممه في الروعه هههه اووووه نسيت اقول شيء المفروض ماننساه ترى بعد ماسوينا المشكله هذي جونا شله فش فاش معصبين يقولون ليش ماناديتونا نضارب معكم<<اموووت على الفزعات ...اتذكر وجه سلمى بالذات يوم خاصمتنا... والله انهم كفو .. طيب بعد ماخلصنا من نوره ننتقل من برود نوره الغشمري إلى حراره نوف وتفاعلها في عالم الرجه نوف الغامدي: تسمى نوف وتكنى با(الحجه) اما عن سبب تسميتها حجه ما اتذكر بالضبط متى ولماذا تم اطلاق هذا اللقب عليها لاكن اللي اعرفه ان دفاشتها تقريبا هيه اللي تمد للقب بصله وترى مانسينا سبب التسميه إلا دليل على ان الكنيه اطلقت عليها من زماااااان ...المهم ماعلينا الكنيه الثانيه(سلفستر) سلفستر هذي بطه سوداء رهيييبه وهي شخصيه كرتونيه في فلم كرتون (تاز) ياليت ياليت اللي ماشافه يفتح على النت ويشوفه لانه ياخذ من شخصيه نوف بقوه يعني حتى يوم يتكلم تطلع تفالين من بين اسنانه بلييييز شوفوه واختصرو المشوار هههه نبغى ذلحين نروح لشخصيتها..نوف زي ماقلت تحس انها بنت حركيه على قولتهم وحاره وبنفس الوقت مزعجه ولسانها طويل خخخخ بس ترى قلبها طييييب وحقت فزعاااات بقوووه..وترى من اكبر العاشقين للفلفه في العالم هي نوف تحب تتمشى وماتحب تقعد جالسه يعني الي تقوم تتمشى مع نوف تتكسر رجولها ونوف باقي تتمشى ماشاء الله عليها المهم ان اللي الاحظه ان في بعض المشاكل اللي كانت تسير لنا مايدخلون كل اعضاء الشله فيها يعني اقصد انه ممكن ان وحده من الابلات تمسك ثلاثه من شلتنا وتدخلهم الاداره وتسوي لهم مشكله على أي شي سووه او انها تمسك مجموعه ثانيه يعني على حسب تعرفون الابلات اللي يلاقونها قدامهم يمسكونها اللي الاحظه ان نوف أي مشكله لااااازم تكون فيها مدري حظها بايخ ولا ايش البنت هذي مشاكلها كثيره بس تراها غالبا تكون قد المشاكل اللي تواجهها لما تتميز به من طوله لسان وصوت عالي وتخش في عين ام اللي تتفاهم معه ماشاء الله عليها هههه ..في المظاربات نوف تنفعنا بقوووه وترى نوف من ضمن اللي دشرو في طفولتهم على يد اسماء عبيد وجمانه يعني كانو بعد مايطلعون من المدرسه الابتدائيه في الصرفه يرحون يلفلفون على البيوت ويتمشون شويه ومدري ايش معنى يروحون لسيرين في بيتها يمرونها شوي وبعدين كل وحده تروح لبيتها هذي تسمى دشره مبكره لانهم باقي ابتدائي ويسوون كذا ههه في المتوسط كانت نوف مستوليه على انشوده (ياطيبه) وانا وابتهاج(فرشي التراب) وياليل ياعين غثينا العالم فيها طبعا محد كان يغني ياطيبه إلا نوف على فكره صوتها حلو يوم تغني ماشاء الله لحد الان تغني لنا في الجامعه بس مانخليها تغني لنا ياطيبه خخخ نرجع لمشاكل نوف طبعا في المتوسط ابو نوف جاب لها سواق علشان تروح معه وتجي معه والسياره اللي تركب هيه فيها مليانه بنات من مدرسه ثانيه ومن الثانوي كانت نوف متمشكله معهم من اول يوم عرفتهم فيه وهي مشااااكل معهم هذا اكبر دليل على حبها للمشاكل<<عاد كلنا نحبها بس مو زي كذا خخخ ترى حتى سواقيننا في الجامعه لحد الان نتمشكل معهم بس مو نوف لحالها كلنا ههه امااا مين اللي ناشب لنوف في دشارتها فهي السيده(فوزيه) اطال الله في عمرها وسدد خطاها ودام لها قوه ضربها ماشاء الله عليها يعني تحسون ان نوف إذا قالت بتسوي شيء تنشب لحد ماتسويه بس إذا كانت فوزيه معها قسم بالله جو ثااااااني احس كانها امها يعني تلاقون فوزيه تضرب في نوف ضرب وتقول: نوف عيب.. ويوم نكون في الباص تنشب فوزيه لنوف Lيانوف اجلسي يانوف عييييب وتصفقها طبعا تخيلو صياح فوزيه وصوتها مع قوه الضرب اللي يجي نوف ما اخفي عليكم نوف احيانا تدافع عن نفسها لاكنها تقدر في الوقت ذاته ان فوزيه بمثابه امها خخخخ<<مدري يمكن علشان فارق الطول بس والله فقدنا فوزيه في الجامعه سارت نوف تلعب بذيلها خخخخخ ومن صفات نوف انها تتقبل الافكار الجديده وتتأثر بالاشخاص الاخرين بسرعه بس ترى هيه اصلا تحب انها تتأثر يعني ماعندها مشكله بس المشكله في انها ممكن تنحرف في أي لحظه بسبب هذي الصفه هههه بس لاتخافون مدام ان راس فوزيه يشم الهوى خخخخ المهم ومن صفات نوف ايضا انها إذا اجتمعنا في جلسه او كنا قاعدين نسولف مع بعض إذا كان فيه بيننا جوال انسو منها تقعد تطقطق فيه طوووول الوقت تمووووت في عالم الجولات احس لو نحرمها من جوالها يوم بيجي في عقلها شيء عاد كلنا نحب جولاتنا بس مو زي كذا اصلا دايما نخاصمها على حركه الجولات هذي وعاد إذا كانت فوزيه موجوده تقوم بالواجب على اكمل وجه ملااااااااااااحظه <<لاتغركم قوه نوف ترى يوم يسير موقف محزن لنا مثلا فارقنا وحده من صاحباتنا ولا بتنقل وحده منهم ترى نوف إذا بكت انسو انها تسكت مع انها تمسك دموعها لآخر لحظه بس إذا نزلت دموعها خلاااااص ماعاد تسكت إلا بطلعه الروح بكينا وخلصنا وهيه باقي وهذا يدل على قوه تفاعلها مع مواقف الحياه <<مسويه نفسي ميسره طاهر ...المهم باقول موقف سار لنوف اعجبني بقوووه مره قلنا بنروح نزور نوره الغشمري لانه سار لها حادث المهم نوف وابتهاج كانو جايين سوى مر من عندهم عامل بنقالي يضحك لهم ويقول الله الله <<يعني يغازل هوه ووجه خخخ نوف وابتهاج انقهرو منه واليوم الثاني يسولفون في المدرسه مع الشله عنه ويسبونه المهم بعد البحث والتنقيب اكتشفنا انه العامل حق اهل فوزيه خخخخ عاد فوزيه اللي كشفته وتقول:قطع الله ذاك الوجه يااااويله لو انها تكشف عليه طبعا البنقالي ذا دايما نتريق عليه ونقول ان تصرفاته غبيه درجه اولى وآخر شيء طلع معجب خخخ هذي نوف وقلت كل شيء عنها وبنروح ذلحين لعالم مزووون مزنه الحارثي: للمعلوميه مزنه هيه اخت صباح وكلهم في نفس الشله هذا تعريف مزنه هههه تسمى مزنه وتكنى شريكتي خخخ<<لان اغلب الاشخاص اللي تعجبني شخصياتهم او أي شيء فيهم انصدم اني الاقيها تسألني عنهم وتقول يعجبونها واغلب الاشياء اللي تسير لي تسير لها مدري ويش السر فيه؟؟ طبعا اول يوم شفنا فيه مزنه في المتوسط لما دخلت علينا في الفصل هيه واختها لابسين شنط اكبر منهم ومزنه كان شعرها طويل وعلى قوله ابتهاج تقول لمزنه ترى كنتي ثقيله دم بالضفيره خخخ مرت الايام وتعرفنا على بعض وقويت العلاقات وطلعو ساكنين بنفس حينا عاد اول ماجات مزنه لفصلنا كانت ابله(ام الخير) معجبه فيها هيه واختها وعلى بالها انهم مؤدبات <<طبعا ابله ام الخير هذي كنا خايفين ندخل النار بسببها من كثر اللي كنا نسويه فيها بس اشوى اننا لما تخرجنا تسامحنا منها وسامحتنا ..المهم مع الايام انصدمت ام الخير ان مزنه واختها نفس حركاتنا واخس خخخ طبعا كانت تتهمني انا باني انا اللي خربت مزنه..... اساسا هيه رجه بس عاد تعرفون الواحد يوم يروح لمدرسه جديده ويحس انه باقي ماعرف احد وباقي ماتأقلم عاد مع الايام تاقلمت مزنه هيه واختها والابلات تمنو انهم ماتاقلمو ههه المهم نروح لشخصيه مزنه <<كنا كلنا واقفين في صف مزنه ضد الزواج بس مادرينا انه مااافي احد بمستوى عنادها في هذا الجانب خخخ من صفات مزنه انها عنيده نوعا ما وترى لو تزوجت بتسير غيووووووووووره على زوجها بشكل غير طبيعي انسانه صفه الوفاء فيها متواجده بقوه وقلبها طيب تموووووت في المقالب وتحب تضبطها مع اختها ضدنا تتلقف وتضارب وتتحدى وفوووق هذا كله خواااااااااافه درجه اولى لدرجه انها في أي لحظه تكون هيه فيها غافله نصيح فيها على طووول تنقز اسماء الهبيلي كانت تسوي فيها حركه حلوه إذا كانت الابله تشرح ومزنه مسرحه تدف الطاوله اسماء بقوه على فجئه طبعا مزنه تنقز على طووول خخخخ بحكم انه كان فيه مجموعه في الشله نسميهم الاطفال كانت مزنه من ضمنهم ويوم شافتنا نقول عنها كذا ضبطت الدور يعني سارت تحط السين <<ثاء وتستهبل بس مررره حلوه عليها الحركه ماشاء الله اما عن قصه مزنه مع النحاسه وسوء الحظ فهيه بعد ماتعلقنا فيها وتعلقت فينا وسارت اقرب وحده لها فينا نوره الغشمري في ثاني ثانوي نقلت نوره الغشمري لمدرسه ثانيه كنا مقهورين انها نقلت طبعا ولما جينا لثالث ثانوي نقلو اهل مزنه لديرتهم عاد تعالو شفو حظ مزنه المهم البنت شدت حيلها وقالت علشان نسجل احنا وإيها في جامعه وحده ولما اختبرت القدرات وكل شيء >>>>فاتها وقت التسجيل علشان زواج اخوها دنيا حظوظ

يعني من بعد ثاني ثانوي مزنه ماعاد سارت تدرس معنا ..بس إن شاء الله تسجل معنا الترم الثاني في الجامعه ويعوضها ربي ويعوضنا ...المهم ان مزنه من عشاق

الفش فاش <<هوه فيه احد مايحبه اصلا..كنا احيانا إذا اشترينا فش فاش وهيه غايبه نعطي (رباب ونوره)ويرمونه لها في الحوش لانها كانت جارتهم ..اممحق من جاره انا قلت لكم ان مزنه ضد الزواج صح .. طيب تراها ملكت وعلى وجه زواج ..السالفه قسمه ونصيب مو عناد وعلى فكره خطيبها يسير اخو سالم زوج صباح يعني مزنه وصباح سارو سلايف ههههه فيه شيء ماقلته !! مزنه كنا نسميها(سعيد المالكي) بسبب سالفه سارت نروح مع القصه .. في يوم من الايام في المتوسط سار تفتيش المهم انهم لقيو صوره رجال مخشوشه في طاقه الفصل يعني واضح ان صاحبتها يوم دريت انو فيه تفتيش تورطت ودستها في الطاقه المهم نجي للصوره <<اولا الصوره باااين عليها انها قديمه بقووه اصلا حتى لونها رايح على اصفر والرجال اللي في الصوره لابس شماغ وشعره طويل يعني تقريبا لحد الكتف واعلى بشوي وماسك سجاره في يده ومتكي المهم ركزو على شعره لانه طالع في الصوره كانه طبقتين ..بعد البحث والتهديد اعترفت الاخت(سيرين <<الباشا..ان الصوره لها وان اللي في الصوره هوه ابوها !! طبعا انصدمنا لان اللي نعرفه ان ابوها مطوع وغريبه ماقالت لنا بانها جايبه صورته من قبل التفتيش..طلعت هذي صوره ابوها على ايام الدشره يعني قبل مايتطوع وهيه جابت الصوره بالغلط ولا شافتها إلا وقت التفتيش طبعا قلنا لها اننا كنا نضحك على شكله واحنا في الاداره لاننا ماكنا ندري انه ابوها الشاهد من ذا السالفه او المناسبه او الزبده اننا لما سرنا اولى ثانوي قصت( مزنه) شعرها المهم ان الشله مشبهه على قصه مزنه كأننا قد شفناها طلعت نفس قصه ابو سيرين اللي في الصوره خخخخ مسكنها على مزنه ولا عاد سميناها إلا بابو سيرين(سعيد المالكي) وطبعا مزنه ارتفع الضغط عندها 200 بعد مزنه ماراح نروح بعيد بنروح لاختها صبوحه المملوحه صباح الحارثي: طبعا صباح تعتبر من الطويلات في شلتنا يعني لايغركم ان اختها مزنه من الصغار ترى هيه عكسها في سالفه الطول ماشاء الله عليها.. اول مره تشوف فيها صباح تعطيها انها هاديه ورزه وماتحب كثر الهبال والتريقه ..بس إذا عرفتوها زين تطلع عكس هذا كله يعني هيه بس مظهر خارجي ديكووور .. صباح فيه حركه غرييييبه يعني يوم نتضارب ممكن انها تضارب برجولها ويديها بس عندها مشكله(التوازن) البنت هذي تندف بسرررعه فااائقه يعني بس لو تصكينها على كتفها صفقه بسيطه تطيح او مثل لو نكون في زحمه واحد دفها على طوووول تطيح التوازن معدوووم عندها خخخ في ايام المتوسط معروفه لعبه (العريس والعروسه)كنا اول مانختارها تنط صبااح وتختار ... ايش تتوقعون ؟؟ طيب انا باقولكم البنت هذي كانت مستغله طول شعرها بحيث انها تسويه كانه لحيه !! يعني تجيب الضفيره قدام على كتفها وتمسك الشعر اللي موجود في آخر الضفيره وتحطه على وجهها بحيث انه يطلع كأنه لحيه تمسك طرفي اللحيه بشباصه بحيث تثبت الطرفين الشعر في رائسها للاستفسار عن الطريق يرجى مراسله صباح...المهم انها كانت تسوي كانها القاضي في كل لعبه إذا لعبنا عريس وعروسه وكانت هيه العريس لاااااازم يكون العريس مطوع البنت عاجبتها الحركه بس والله تضبطها ماشاء الله عليها .. صباح في فتره المتوسط كانت مملكه على سالم ولد عمها عاد شوفو انواااااع التعليق عليها وطبعا كانت تساعدنا مزنه في التعليق على صباح بنقل بعض الاخبار عن سالم اللي ثلاثه ارباعها كذب يعني حتى طوله قالت لنا مزنه عنه هههه طبعا صباح كانت كل شيء ولا تسبون (سالم) ولا تتريقون حتى انها كنا نشخمط على السبوره قبل ماتجي الابله فكانت صباح تقعد تكتب( s) طوول الوقت على السبوره ولاااا بعد البنت تنقهر إذا مسحت الابله حرف سالم آخر شيء قررت البنت انها تكتب اسم سالم على السبوره لاكن بطريقه غير مباشره عاد في هذي طلعت البنت ذكيه ماشاء الله عليه ... نطت لاعلى السبوره عاد مايحتاج تنط ماشاء الله عليها طويله من يوم عرفناها المهم انها كتبت في اعلى السبوره(جمع مذكر سالم)! اهم شيء عندها ان في الجمله سالم خخخخ عاد الابلات على بالهم إننا ماخذين درس نحو وهذي الكلمه بقيت من الدرس ومامسحنها مرت الايام وسرنا في الثانوي وبعد ثالث ثانوي فارقتنا صباح لانها تزوجت في صيف اولى ثانوي 1428 وما تتخيلون آخر يوم لنا معها كيف كان ...كان البنت جايبه كيس هدايا وش كبره وتعطينا الهديا ودموعها في عينها وتسلم علينا لانه آخر يوم لها في الدراسه ذاك اليوم كانت دموع الشله اكبر تعبير عن قوه الموقف ماتتخيلون كيف اشكالنا غلط وإحنا نبكي لان مو لايق علينا إلا الضحك والهيصه واللعب لاكن لما نفارق وحده منا يتوقف كل شيء وماتشوفون إلا الدموع في وسط اجواء الحزن ولحظات وداع صباح نسمع صياح بنت تقول (لاااااا مو مصدقه رجه بس رزه يبكون !!) طلعت جمانه<<من شله فش فاش جات جمانه وقعدت تهدينا وحده وحده وتنكت وتضحك تبي تصنع جو ثاني بس اصلا احنا لو ركزنا في بكاء فوزيه كان ضحكنا هههه المهم اننا فارقنا صباح واحنا مقهورين وتزوجت صباح بس ماحضرنا زواجها لانهم سووه في ديرتهم وذلحين صباح عندها ولد اسمه (هيثم) تقريبا عمره سنه إذا ماخاب ضني <<ترى الخبط باعمار الصغار بس مشوها دايم اعطيهم اعمار من راسي...الزبده ان الخبله مزنه سارت خاله هع هع هع ....المهم الله يخلي لها ولدها ويحفظه ويمكن على بال ما اخلص هذي الروايه تكون جابت لها بنت ..وعلى فكره صباح سوت مفاجئه تجنن عمرنا ماننساها بعد ماتزوجت واحنا سرنا ثاني ثانوي في يوم من الايام ضرب فيوز عند سيرين وجابت قهوه وتمر وحركات المهم استغربنا وش ذا الكرم فجئه شوي واحنا في الفصل إلا دخلت علينا (صباح) تخيلو الموقف كيف ما احلاه ... المهم ان مزنه كانت عارفه ان صباح بتجي بس ماقالت لنا قامت تقول لها سيرين ترى والله انا كنت حاسه انها بتجي علشان كذا جبت القوه عاد وتنط مزنه وتطقها عناد مع سيرين مزنه تقول:والله انك ماكنتي داريه انك جبتي القهوه كذا ....وسيرين تقول:ياحوووول ياذا البنت إلا بتسويها مفاجئه ...عاد عنادهم طول ..بس المهم ان صباح في ذاك اليوم علمتنا انها حامل وانا مابغيت اصدقها إلا بعد نكد وحلف وقله حيا المشكله انها كانت تناطط معنا طووول اليوم ولا قالت لنا انها حامل إلا آخر شيء ههه هذي صباح وعرفناها نبغى نروح مع اسماء عبيد اسماء عبيد: قبل كل شيء بأتكلم عن صفه في اسماء تقهر وهيه (المزاجيه) البنت هذي مزااااااجيه درجه اولى يعني يمكن تلاقيها ساكته نص ساعه واللي يشوفها يقول انها زعلانه ولا معصبه وآخر شيء تطلع كذا ودها تقعد ساكته وعلى انها مزاجيه فيها عباطه على كيف امك.. ومن اصعب الصعاب انك تفهم اسماء يعني البنت هذي غامضه بقوه ومايعرفها إلا اللي صاحبها .. بس إذا عرفتوها زين تعرفون ان داخلها روح مرح وتحب النذاله والمقالب بقوووه.. الي اهم من هذا انا ابغى اتكلم عن جانب من جوانب طفوله اسماء البنت هذي شنت حمله للتدشير في حارتهم وكان من ضحايا الحمله نوف الغامدي وجمانه ..هم مايعتبرون من الضحايا هم معها لا كن هيه القائد يعني الراس الكبير على قولتهم المهم انهم كانو يوم يطلعون من المدرسه ايام الابتدائي مايروحون لبيوتهم زي الاوادم لا طبعا يروحون يلفلفون في الحاره ويدورن على كيف كيفهم حتى انهم كانو يروحون لبيت سيرين ويدقون عليها الباب وتفتح لهم ويروحون وعلى هذا الحال يوميا لحد ما انتهت تفعيلات الحمله طبعا الغرض من هذي الحمله الترفيه عن النفس وزياره الاصدقاء والاقارب يعني الحمله كانت قممممه في البراءه بس تعتبر حمله داشره قبل كل شيء..لا زالو افراد هذي الحمله يذكرون اسماء ويذكرون الفلفه اللي سوتها لهم .. من صفات اسماء انها ماتحب تتحمل شيء على راسها بس إذا وكلتيها شيء وقالت لك خليه علي خلااااص اترك الخبز للخباز على قولتهم يعني ماشاء الله تشيل الشيء وتقوم به على اكمل وجه ... زي في حفلتنا اللي سويناها حقت التخرج فكرنا مين اللي تجيب الدي جيه قالت اسماء خلوه لي انا اجيبه ... وفعلا والله ماشاء الله عليها فكفكت روسنا بالاغاني <<هذي سبه ولا مدحه ههه من جد اتذكر انها ما خلت ولا اغنيه على وجه الارض إلا شغلتها بصراحه كفو .. و ترى لها موقف بطولي مع ساميه في الجامعه انقذتها بس ماراح اقوله ذلحين شوي واقوله بالتفصيل الممل المهم نسيت اقول ان اسماء في الجامعه معها مها الحارثي و ساميه المالكي ونوف الدعجاني ماشاء الله كلهم في نفس الجامعه يعني ربي عوضها لانها في ثالث ثانوي نقلت لمدرسه ثانيه وكانت هيه وتغريد العصيمي في نفس المدرسه يعني نقلو الثنتين لنفس المدرسه المهم انهم كانو يستخدمون الطريق القديمه للتواصل كانو يرسلون لنا اوراق (رسايل) مكتوب فيها كل شيء بخاطرهم بتسألوني مع مين كانو يرسلونها؟؟؟ مع الحمام الزاجل خخخ تدرون مين الحمام الزاجل هذا عمر اخو سيرين المالكي وعبدالهادي اخو اسماء عبيد كانت تغريد واسماء يكتبون لنا الرسايل واسماء تعطي عبدالهادي يعطيها عمر وعمر يعطي اخته سيرين وسيرين تعطينا وهكذا ...ترى مو بس يرسلون رسايل مره ارسلو لنا هديا قممممه الروعه لكل وحده فينا قلب صغير وفيه ورقه مكتوب فيها (مس يو ..او ..آي لف يو ..الخ) المهم وحلوى قلب في وسط هذا القلب ....الهديه شكلها يجنن بعدين الاحلى انها مرصوصه في علبه ذوووق ومرتبينها بس الهديه راحت عند ناس همج يعني لو سيرين ماهي طويله ولها هيبتها كان الهديه انعدمت كلها لاكن وزعناها بيننا بالذوق ولاول مره نستخدم الذوق في شلتنا ....... بعد اسماء عبيد نروووووح مع تغريد تغريد العصيمي: لما نتكلم عن تغريد نبداء بطفولتها تغريد هذي ايام الابتدائي كانت من ضمن (بنات الابلات) تدرون يعني ايش بنت الابله عند الابتدائي؟؟ يعني احنا كنا شايفينها في التوب ومحترمينها بعد تعرفون مقدرين ان امها تدرسنا هههه طبعا امها درستني في ثاني ابتدائي انا وبعض اعضاء الشله وماودي افضح نفسي واقول اني كنت انام في حصتها وخاصه حصه (القرآن) يمكن انها قد نسيت مانبغى نذكرها ههه ...طبعا تغريد ايم الابتدائي كانت مجنووونه درجه اولى مدري يمكن علشان امها كانت معها فالبنت اخذت راحتها بقوه ... طيب باقي ماقلت لكم شيء مهم عن تغريد ..الاخت تغريد اول مادرت بمشروع روياتي هذي قالت لي : (اكيد بتكتبين "ابو دميعه"صح!!؟) قلت:اكيييييييد* اللي بقوله لكم ان تغريد نسميها في الشله(ابو دميعه) والسبب معروف من الاسم نفسه ..البنت هذي زي مايقولون دموعها في جيبها يعني بكايه بقوه عاد تخيلو مع مزح شلتنا الخفيف !! وش بيسير فيها يمكن لما اقول انها بكايه بيجي على بالكم انها كئيبه وهاديه ههاااااي هذي في الاحلام تغريد على ان في قلبها طيبه وبراءه إلا انها طوول الوقت تتريق بخلق الله وتحب الضحك واللعب والهيصه بعذرها تربت معنا وتربينا معها ...نرجع لسالفه ابو دميعه إذا شفت انسان يبكي تحزن عليه وهذا الحال مع تغريد في البدايه بس لما زودتها وسرنا عارفينها سرنا احيانا نضحك من بكائها !! زي مره من المرات في ثاني ثانوي كانت تغريد راااجه الدنيا علشان عندها اختبار كيمياء يوم الاربعاء المهم انه جاء اليوم الموعود ورحنا وتوزعنا في قاعات الاختبار وبعد ماخرجنا من الاختبار سرنا نسأل بعض حليتو ولا لا <<طبعا الغالبيه لا خخخخ المهم ان تغريد اختبارها هوه الكيمياء سألنها كيف اختبار الكيمياء قالت :انها حلت وانه حلو..لحد الان الاوضاع على مايرام يوم سرنا جالسين مع بعض في الساحه ونسولف وضحك وفله إلا مها الحارثي تصيح وهيه مصدومه طالعنا إلا تغريد يدها على وجهها وتبكي!! طبعا بعد التنقيب والصدمه عرفنا ليه تبكي تدرون ليه تبكي ؟؟<<يوم السبت عندها اختبار رياضيات وشايله همه ههههه والله سرنا نرضيها ونضحك يعني فرحنا انها حلت في الكيمياء قامت تبكي على الرياضيات .. طبعا تغريد درسنا احنا وإياها من الابتدائي مع بعض ونقلت في ثالث ثانوي مع اسماء عبيد لمدرسه ثانيه سبق وان قلت لكم عن الرسايل اللي كانو يرسلونها مع الحمام الزاجل..المهم في اولى متوسط كانت تغريد عريفتنا نكدت علينا عيشتنا الله يرضى على مها يوم تكون عريفه تغريد اول ماينتهي الدرس وتطلع الابله تنط وتسوي فيها عريفه....وطبعا إذا سالتها المحاربه الاولى للعرايف وهيه سيرين وقالت لها :مييييين وقفك عريفه؟؟ تقوم تغريد وتأشر على لوحه الاسماء حقت الفصل اللي مكتوب فيها اسمائنا واسم العريفه وتقول:اللوحه وقفتني عريفه....خخخخ يلعن اووووم النشبه بس البنت باين ان عندها فصاحه من ايام الطفوله لانها ترد علينا بثقه هههه وترى كان عندها حركات نص كم ايام الطفوله يعني البنت اسم الله عليها شعرها حلو كانت تقوم عند الصبوره وتفكه وتقعد تناطط وتسوي استعراض لحد مايطالعون البنات غصب عاد إذا طالعو تقوم عليهم باسلوب نفخ وتقول Lقولو ماشاء الله وتشمق وتلف عاد الحركه ذي ماسوتها مره ولا مرتين علشان نمشيها لازم تسويها بشكل اسبوعي هههه عاد البنات ماب اليد حيله كل اسبوع نسمي على شعرها هههه ترى رغم الجنان اللي في تغريد إلا ان عندها قلب طيب وعلى قولتهم رهيف بس فيها حركات استغباء !! هيه ماتسمى حركات استغباء بس علشان شلتنا عنيفه فتسمي البراءه استغباء ههه.... بعد تغريد بنرووح لعالم الجنان والضحك مع نوره عجيان نوره عجيان: نوره واختها رباب في نفس شلتنا طول الله بأعمارهم وطبعا من اول ماعرفو شيء اسمه دراسه إلى ثالث ثانوي وهم في نفس الفصل ماشاء الله عليهم طبعا بعذر انهم اخوات وإذا غابت وحده منهم الثانيه تجيب لها الواجبات <<كذااابين اصلا الثنتين كلهم كسلانات ههه ولا ترى يوم كنت انا اغيب كانو يمرون بيتي ويعطوني الواجبات مسوين فاعلات خير في الحاره ههه بس بصراحه ماقصرو تحملو غيابي الكثير....المهم نروح لشخصيه نوره طبعا البنت هذي ماخذه الحياه بطولها وعرضها نكته!! يعني الاحظ ان نوره تحب الضحك والفله وعلى فكره حتى إذا قابلتها مواقف حزينه في حياتها فهيه من النوع اللي يبتسم رغم الالم وتكسر الحزن بالضحكه<تعجبيني يانوره..والبنت هذي مرجوووجه وتحب التريقه حتى لو على جثتها ههه ومابغى انسى اقول لكم شيء البنت هذي غشاشه وتحب الغش في الاختبارات بشكل جنوني يعني احس انها لو كانت عارفه الاجابه في الاختبار تفضل انها تكتب اجابه مغشوشه افضل من اجابتها وسبق ان انكشفت انها تغش اكثر من مره وعلى راسها ماده الانقلش لاكن مافي امل تبطل الغش.... اما عن قصتها في اهتمامها بالمظهر الخارجي ايام الابتدائي في ايام الابتدائي كان شكل نوره كما يلي: ظفيرتين وماشاء الله شعرها طوويييل وتسويه ضفيرتين المهم كنا في ثالث ابتدائي انا وإياها في نفس الفصل المهم اني قصيت شعري القصه المعتاده (كاريه) البنت مدري وش ضرب في راسها قالت تتحدوني اقص شعري..؟ عاد مدري من هيه هذي اللي قالت لنوره اتحداك ... المهم البنت شدت حيلها ورجعت للبيت وهيه متحمسه وتبغى تسوي فيها انها قد التحدي عاد راحت البنت للبيت وتمسك المقص وتقص ضفايرها المشكله حسب وصفها لنا انها قصت كل ضفيرها لحالها عاد تخيلو كيف القصه ؟؟؟ المهم انها طلعت على اهلها بشعرها المقصوص واهلها الله لايلومهم انصدمو عاد مدري إذا كانت انضربت بس هيه شفرت هذا المقطع من السالفه .. المهم انهم استسلمو لامر الواقع اللي حطتهم نوره امامه وقامو ضبطو قصتها وساوو شعرها اللي لعبت فيه.. المهم انها جاتنا اليوم الثاني وهيه قد التحدي والبنت قاصه شعرها وتنطنط فوق الطاولات .. طبعا ايام المتوسط كانت نوره من المرابطين في الاداره مع المشاكل عاد مشاكل المتوسط تافهه بس عاد نوره زودتها وبعد احنا معاها في كل مشكله اما في الثانوي فالحال نفس الحال ماتغير شيء بس سار الجنان زايد عندها بعد ما انخطبت ..عاد بعد خطوبه نوره جنناها بالتعليقات عليها هيه وخطيبها تركي واتحدها إذا كانت نسيت التريقه اللي قطعناها بها خاصه قبل ايام زواجها وكنا نسمي المخطوبات من شلتنا ومن شله فش فاش (عوايل) يعني كل مافتحو سالفه تخص المخطوبات قلنا يالله العوايل مع بعض والعزابيه مع بعض ..طيب نوره بعد الزواج تتوقعون انها هدئت ؟؟؟ لان صباح بعد الزواج هدئت بس نسبيا يعني شويه مو كثير ..بس نوره وسيرين الله يعطيهم العافيه زادت الرجه عندهم بعد الزواج.. يعني نوره انخطبت وملكت في الاجازه اللي بين الترمين وتزوجت في اجازه شهر 4 اللي في الترم الثاني يعني رجعت تكمل دراستها معنا بعد زواجها ورجعت لنا البنت وهيه مجنونه زياااده ههه يعني اول يوم جات والجوال في جيبها جايبته للمدرسه وجوال كاميرا بعد عاد لو كشفوها في مدرستنا بيسوون لها قضيه وتحسبونها داستها ولا خايفه البنت حاطته في جيبها وتقول عادي انا قريت الاذكار بس والله مادرو عنها ..عاد ابسولف لكم عن جنانها بعد الزواج بعد ماراحت البنت للحفر مع زوجها راحت مدري وش تبغى تسوي في الفرن المهم انها حاست الدنيا لحد ما انفجر الفرن عليها ولما راحت للمستشفى طلعت حامل عاد لما راحت عند اهلها جينا زرناها احنا وشلتنا في بيتها وسلمنا عليها .. وهيه ذلحين حامل يمكن تولد بعد ما اخلص الروايه عاد امنيتي ان بنتها تطلع زيها فله وتحب الضحك والهيصه بندخلها في شلتنا على طووول هههه عاد نوره تتريق بي تقول بتسميها (كشوحه) باسم الشهره حقي خخخ اما عن تجنين نوره للابلات فكان فريد من نوعه يعني في ثاني وثالث ثانوي كانت غلطه اداره المدرسه لما حطو نوره عجيان واسماء الهبيلي في فصل واحد يشردون من الحصص اكثر من يحضرونها ومع العلم ان الثنتين هذولا إذا اجتمعو ماينفعوننا في المضاربات يعني احسهم يسيرون منافقات ويتشردون من الضرب ومايواجهون المضاربه ويدافعون مع ان نوره إذا كانت لحالها تدافع وتعرف تضارب بس إذا سارت هيه وعوازم يسيرون خوافات بس حقين مقالب ونذاله يعني بعد مضاربه من المضاربات اللي سارت لنا مع شله فش فاش لاحظنا وبشده ان الثنتين ذولا يحاولون ينسحبون من السالفه قمنا نستر عليهم ومافضحناهم قدام اللي نتضارب معهم وسوينا انفسنا اننا ماندري ان فيه منافقين من فريقنا في المضاربه علشان نبقى بهيبتنا قدام الخصوم الاخرين المهم اننا اول ماوصلنا بيوتنا وكل وحده دخلت بيتها لقينا رسايل انتشرت عند شلتنا من شله فش فاش يقولون فيها(ان في شلتكم منافقين مثل سطيف وابو غالب <<شخصيات مسلسل باب الحاره وهم يقصدون نوره عجيان واسماء الهبيلي) عاد بعدها هزئناهم ولعل فيه نوع من التغير الغير ملحوظ خخخ انا قلت لكم ان نوره معها اخت اسمها رباب ... نروح لرباب ونشوف وش عندها.. رباب عجيان: رباب تسمى احيانا (روبي) مع اننا اول ما اطلقنا عليها الاسم هذا وهيه في المتوسط عصبت خخخ علشان روبي المغنيه الوسخه ههههههه طبعا اللي يشوف رباب يقول ان هذي هاديه وانها عكس اختها نوره وهي خرطي ...رباب نوعا ما مزاجيه يعني يمكن تقعد ساكته ساعتين بدون سبب وتكون في هذي الساعتين هاديه وتفاعلاتها قليله واحيانا تجيك نشيطه وراجه الدنيا رج ... صح اني احب انرفز سيرين بس ما اضبط الدور زي رباب يعني رباب في التريقه والمصاخه والمصخره تاخذ المركز الاول واحلى ما فيها انها إذا قالت نكته ولا تريقه لااا زم تضحك بصوت عالي على نكتتها وطبعا ضحكتها سبق وان اتريقنا عليها<<ماتعدي علينا...المهم ان رباب اللي من النوع اللي يسكت يسكت بعدين يجيب لك تريقه طبلونها 200 وحسب ملاحظاتي وملاحظات الشله واستنتاجاتهم ان اللي تجلس مع رباب يوم كامل يكون هذا اليوم بالنسبه لها مليء بالذنوب والمعاصي خخخ استغفر الله يعني نقصد من ناحيه انها تمسك خلق الله كلهم تقطيع وكل ماتمر ابله ولا بنت ولا حتى فراشه إلا وتجيب تعليق على مشيتها ولا على لبسها بس والله غالبا تجيب تعليقات تضحك وإذا قلنا لها (استغفر الله لاعاد تتريقين) تقولLمحد قال لك تضحكين ... عاد يوم طلعنا للجامعه اشكال البنات تساعد على تنميه موهبه رباب يعني اللي تلاقينه خابصه وجهها واللي تبي تسوي لفت نظر المهم ان رباب ماسكتهم بالدور حتى سواق الباص ماخلته جابت لوجهه وخشمه تشبيه هههه في موقف سار لي في الابتدائي مع رباب مانسيته طبعا الاخت يوم اذكرها فيه تقول انها نسيته بعذرها اللي يده في النار مو زي اللي يده في النار ... في يوم من الايام جاتنا مدرسه الرياضيات واحنا في الابتدائي قالت:(كل وحده بكره تجيب معها ورقه كراس ومقص وشطرطون) المهم انها هددتنا وقالت ترى اللي ماتجيب اغراضها ياويلها ولا زم كل وحده تجيب اغراضها لحالها إلا الشطرطون لو تشترك فيه اكثر من وحده عادي ...المهم اني جيت انا وجبت اغراضي كامله بس ناقصني (الشطرطون) ..قالت مامعي إلا اطلب الفزعه من البنت اللي جنبي وطبعا مييييين البنت اللي جنبي؟؟ رباب...طلبت رباب شطرطون وانا خايفه واقولها لو سمحتي ممكن استخدم انا وإياك نفس الشطرطون وإذا جات الابله تفتش على الاغراض قولي اني انا مشتركه معاك فيه ...طالعت فيه بنظره استخفاف مدري استضعاف مدري وشهي المهم وقالتL(لا انا واختي نوره مشتركين فيه) ولفت بطريقه تغلي المهم انها رفعت ضغطي وحقدت عليها حقد على مستوى ههههههه لازم ارجع لها الحركه ذي ..المهم نرجع لشخصيه رباب تقدرون تقولون ماتجامل ابدا وحتى لو حاولت ماتعرف احس يبان على وجهها.. والبنت هذي من النوع اللي يتمالك دموعه لاخر لحظه يعني ماهي سريعه البكاء ماشاء الله عليها وعلى فكره هذي الصفه اكتسبتها رباب مؤخرا ولا زمان كانت تبكي من ظلها اتذكر كل مامسكوها الاداره على شيء وهيه في المتوسط والابتدائي طبعا على طوووول تدعس دموع ....زي سالفه سيرين يوم جابت صوره ابوها بالغلط ولا عرفت انها جابتها إلا وقت التفتيش طبعا التفتيش في المتوسط مو حيا الله حتى كلام ماتقدرين تتكلمين المهم ان في نفس هذا اليوم جابت نوره اخت رباب صور زواج اختها ومدري مين النذله الي راحت علمت الاداره ولما سوو تفتيش كشفو نوره وفتشوها وطلعت الصور من شرابها خخخخ وفي نفس الوقت لقيو صوره ابو سيرين مدسوسه في الطاقه المهم انهم شبكو السالفه على كيفهم وقالو ان نوره مدام انها جابت صور اختها فهيه اللي جابت صوره الرجال<يقصدون ابو سيرين.. ومسكو نوره عجيان في الاداره وبحكم ان رباب اختها مسكوها معها علشان يتفاهمون مع الثنتين على المشكله طبعا نوره عبيطه بقوه يعني مابكت ولو ماهم معصبين كان ضحكت في الاداره اما رباب دعست بكاء مو بصاحي !! وشهقات في وسط الكلمات اللي تطلقها ..والبلا ان نوره بعد السالفه هذي تتريق برباب وتقلدها يوم تبكي في الاداره والمشكله انها هي اللي دخلتها في السالفه ذي << انا احس ان صوره ابو سيرين تركت اثر سلبي على الكثير من افراد الشله.. على فكره نسيت اقول شيء ترى رباب عصبيه لاكن عصبيتها غريبه نوعا ما يعني احيانا تسير اشياء ترفع الضغط ونلاقيها بارده وعادي الوضع عندها وتضحك بعد وإذا سار شيء ينرفز لاكنه تااااااافه جدا نلاقيه معصبه عليه ومسويه حفله هههه بعد رباب باقي اتكلم عن ساميه المالكي: هذي البنت اكثر مايقهرنا ويقهرها انها لحقت على شلتنا في السنوات الاخيره من الدراسه يعني ساميه مادخلت فينا وعاشت معنا جناننا إلا على ثاني وثالث ثانوي بس رغم انها جات متأخره إلا انها دخلت فينا بقوه واحس انها من اول مره جلست معنا فيها حسينا انها وحده منا وبقووووه واخذت على طبعا واخذنا على طبعها لدرجه اننا نحس انا عارفينها من زماااان ..وهيه الحين مع شلتنا في نفس الجامعه مع (مها واسماء عبيد ونوف الدعجاني اللي من شله فش فاش... يعني الحمدلله ربي جمعنا حتى انها قامت بزياره تجنن لكليتنا هيه ومها صح اننا جوعناهم بس اهم شيء فليناها...نروح لشخصيه ساميه البنت هذي هيه الوحيده اللي تقدرون تقولون عنها ذكيه م في شلتنا نسبتها كانت 100% ماشاء الله تبارك الله واعتقد ان هذا هوه السبب اللي خلى شلتنا يتعرفون على ساميه يحسبون انهم بيسيرون زيها شاطرين ياحليلهم خخخخ المهم..ساميه من النوع الصريح اللي مايوقف معك ويسوي نفسه يأيدك في موضوع علشان يجاملك.. وفي نفس الوقت احس انها رغم المرح اللي فيها وحبها للجنان والرجه إلا انها تصلح تستشيرينها في أي موضوع يهمك لاني احسها تفكر بعقلها قبل عواطفها وتكون واضحه في طرح رأيها<<سبق وان استشرتها بس والله طلعت كفو وتعرف تنصح هيه ووجها ههه.. البنت هذي احسها تحب السوالف يعني بمعنى اصح (سولفجيه) ماشاء الله عليها وتحسينها يوم تجلس تسولف معك توسلف لك على انك وحده عارفه الاشخاص اللي هيه قاعده تسولف لك عنهم وانتي فعلا تحسين انك عارفتهم لانها تحكي لك عن شخصياتهم وتحكيلك السالفه باسلوب شيق ... وسبق وان قلت لكم ان لاسماء عبيد موقف بطولي مع ساميه بقول لكم الموقف بالتفصيل..في الجامعه اذن الاذان وراحو بنات الحلال يصلون حطو جزمهم (اكرمكم الله) عند باب المصلى ودخلو يصلون الاخت ساميه كانت جزمتها بوت لما طلعو من المصلى لقيو وحده من جزم ساميه ماهي مو جوده !!! البنات انتظرو لحد مابدو البنات يروحون واتضح لهم مايلي: .... ان فيه وحده بوتها يشبه بوت ساميه فلقطت فرده من عند ساميه وفرده من عندها وراحت..لان فرده ساميه اللي بقيت باقي معها فرده تشبهها ,, طبعا البنات شدو حيلهم وقامو سوو فكره خطيره .. علقو ورقه قريب من المصلى مكتوب فيها (يوجد جزمه بوت فيها من على الجنب كرستال <<يعني وصفو البوت ..ووضحو ان هذي الجزمه انسرقت وكتبو في آخر الاعلان آيه (السارق والسارقه فقطعو ايديهما)!! طبعا قالو لصاحبه البوت إذا بغت ترجعه فهم في المصلى ينتظرونها .. طبعا كانو يراقبون ملامح وجيه البنات الليقرون الورقه يعني منهم إلي تضحك ومنهم اللي تستحقر الورقه ومنهم اللي تتعجب إلى آخره... المهم ان اسماء عبيد يوم جات تطلع من الجامعه طاحت عينها على بنت تمشي لابسه بوت يشبه حق ساميه..!! طبعا اسماء نطت على البنت وقالت له لو سمحتو ارفعي التنوره اشوف الجزمه!! ولما رفعت البنت طلعت جزمه ساميه هههه!! عاد اسماء نسقت الوضع ونادت ساميه ورجع لكل وحده بوتها وسبحان الله مال الحلال مايضيع... طبعا ماقلت لكم شيء ...على آخر ترم في ثالث ثانوي مها نشبت لساميه تقول ابغاك تقولين عيب لاحظتيه في شلتنا ..آخر شيء كان تعليق ساميه كما يلي(مشكلتكم المزح الثقيل لدرجه اني احس انكم لما تمزحون مع الوحده مايهمكم أي شيء غير انكم تضحكون وتنبسطون واحيانا تمزحون مزحكم ذا مع بنات ماتعرفونهم) والله انها صادقه بس اعجبني تعليقها وقلت باقوله لكم .. بعد ما انتهينا من ساميه نروح لميييين ؟؟ تتوقعون مين؟؟ طبعا ماعاد باقي إلا انا يعني باكتب عن كل شلتنا وانسى نفسي .. وفاء الشهري(كاتبه الروايه): احم احم طبعا من باب محاربه الكذب ومدح النفس.. لما جيت اكتب عن نفسي ارسلت رسايل للبنات علشان يكتبون فيها كل شيء يعرفونه عني ..المهم البعض رد والبعض شكله بيرد بعد ما اخلص الروايه خخخ.. اووول وحده ردت عليه ساميه المالكي وقالت في رسالتها: وفاء انسانه في قمه الروعه في كل شيء .. اهم شيء تونسين نفسك..وماتخلين الهموم تسيطر عليك. مرحه ومغامره ...وتمنيت صراحه اني عرفتك من زمان لانك نادره الوجود في هالزمن بس اهم شي اني عرفتك يا احلى فوفو.. وبعدها ردت ابتهاج الشهري: والله ياوفاء يوم قلتي لي اكتب مواصفاتك احس اني ناسيه كل شيء بس متى تذكرت أي شيء برسله بس اللي ذاكرته الحين هوه(انك خدوومه اللي يشوف وجهك يعطيك انك بريئه وانتي من يمها.. إذا حقدتي على وحده واخذتي منها موقف خلاص انتهى الموضوع مهاما تميلحت معك.. تحبين النذاااله من قلبك.. طيوووبه مررره بس مع اللي تعرفينهم ادبك يقل.. هذا اللي يحضرني حاليا.. -وبعد نص ساعه ارسلت ابتهاج تقول: نسيييت اقولك اهم صفه ههههه <<انك باااارده -وبعد ابتهاج ارسلت مها الحارثي تقول: اسمك المشهوره فيه ابو بيضه.. ثرثاره<كلامك كثير بس حلو اللي يجلس معك مايحس بالوقت.. مغامره نمبر1......في المشاكل اللي تسير لنا في الاداره كنتي انتي اللي تواسينا وتهدين وتخلين الموضوع تافه. وبقولك المقوله اللي قالتها فيك ابله نوره الزهراني (كل ماتروحين مكان تلاقينها فيه وفي الاسياب) احسها تعجبني مقولتها هذي.. دااااااجه وماتهمك الدراسه وعلى هذا كله ماتغشين علشان تنقذين نفسك من الرسوب ..بس ماشاء الله كيف نجحتي ...مصارعه...حبوووووبه دمك شوي خفيف مو مره خفيف ههههه قطوعه يعني بعد الدراسه قطعتي صديقاتك ولاعاد تسألي عنهم ..اخوك خالد يجنن يعجبني ماشاء الله <<ترى اي شيء يجي في بالي اكتبه.. ملاااااحظه <<خالد طفل صغير في السن ههههههه ولاتنسي البدي قارد حقك امل الضابوس<<انا باقولكم عن قصه البدي قارد هذي امل بنت فلسطينيه ماشاء الله عليها طووول وعرض واللي عاجبني انها تحبني ودايما في صفي فلما اتضارب مع شلتي الموقره واكون في المضاربه لحالي او متورطه او مضروبه على طوول انادي البدي قارد وتصفقهم بصراحه كانو ينقهرون منها بس والله انقذتني حتى انها مره انقذتني من يدين فوزيه اللي ماترحم ولما كنت اظارب فوزيه جات امل مسرررعه وسحبت فوزيه بضفيرتها خخخخ عاد الشله ماتو ضحك)مها طلبت مني ان اقول قصه البدي قارد لكم) بعد مها ردت عليه سيرين وقالت: إنا بحكم اني آخر سنه كنت انا وإياك في فصل لحالنا فاقدر افهم شخصيتك تمااام التمام تحبين تسوين مشاكل ..مو عشان شيء بس علشان تشوفين اثنين يتخاصمون ..نذااااااله ..ماشاء الله عليك قد ماتنضربين مايبان في وجهك ولاتستسلمين مع انه يجيك ضرب مو صاحي<<الضرب اللي مو صاحي اللي تقوله سيرين تراه يعتبر مزح من الشله خخخخ عندك عقل مدبر للجرائم خطيييير جدا تتمتعين بخيال خصب كباقي الشله الكريمه.. فيك لعااانه لو جمعو لعانه الشله كلها ماتجي قدها.. منافقه لدرجه اولى واقصد بالنفاق انو ما احد يقدر يستأمنك على شيء(هذا الشي اقصد فيه شيء مادي يعني إذا فيه شيء مهم واحد قالك عنه وقال لاتعلمين فلانه ترى بنسوي فيها مقلب فيها ..او وحده تبغى تدس عطر من الشله على طووول تخربين الشغله)طبعا الصفه هذي في جميع افراد الشله بس انتي فيك الصفه هذي 100% يعني في كل وقت ومكان ومع أي كائن يقابلك ... إتكاليه بشكل لايصدق..يعني تحب الاعتماد على الغير. لاكن إذا احد طلب منك خدمه ماتقصرين معه لاكن على حسب الخدمه وعلى حسب الشخص اللي بتقدمين له الخدمه .. همجيه لدرجه انك تشك انها بنت ههه احب شيء عندها السوالف والضحك يعني لوتسولف معها الين بكره ماتخلص سوالفها .. فاشله في دراستها والمشكله انها بمزاجها فاشله. عندها اسلوب للأقناع شيء خيالي .. وتلقب بعده القاب..كشحه<لقبها في البيت ولقبت بكشحه لان لديها نظرات بعيونها تقوم بها للتعجب والانبهار بشيء اللذي سمعته او للاستعداد لفعل امر فيه مصيبه اوإذا كانت تخطط لجريمه بباي:لقبها في المرحله المتوسطه لانها هيه مع ابتهاج (زيتونه) فتسير بباي ابوبيضه:لانها تشبه المصاريه والله وصدقو بعد سيرين ينتقل المايكروفون لنوره عجيان: وفاء ..تحب المغامرات ..وتعشق الاشياء الغريبه.. رمز للأخوه..ولها عن كل مشكله حل.. عندها خبره كافيه عن الحياه وعقليتها كبيره نظراتها بريئه وهيه ام الدواهي..دمها جدا جدا خفيف قلبها ابيض تحب الكل والكل مايحبها هههاآآي ترا العكس يحبها.. تموت في السوالف وتحب تسولف عن عايلتهم لدرجه اني حفظتهم ..عندها موهبه في شرح المواقف بالتفصيل هذا رأيي وطبعا هيه صراحه مميزه في الشله رتبي العبارات ياوفاء حسب كتابتك في الروايه<<هههه آسفه يانوره بأكتبها زي ماهيه بعد نوره جاتنا فوزيه الحارثي: هلا وفاء معليش على التأخير .. فيها طيبه واخلاقها عاليه...ترحم الناس ومااتحب احد يناقشها في موضوع هيه قاعده تتكلم فيه .. ومغاااامره لحد التهووور ..ماتفكر اهم شيء تفلها فيه شيء بعد انا اعرفه ..ابوي يحبها هههه <<فوزيه تقصد انها لما تقول لابوها شيء مثلا بنروح للمكان الفلاني يسألها مين اللي بيروحون معك على طووول تقول له )وفاء بنت الشهري) يوافق خخخ فلذالك ترجمناها انه يحب وفاء خخخ بعد فوزيه ينتقل المايكروفون للاخت رباب الحارثي: منافقه بلعب ...وإذا طالعتي في احد ماتشيلين نظرك لين تنفظحين ...مشفوحه بس تاكل..والجلسه معاها ماتملل ماتفك الوحده لحد ماتحلل شخصيتها. --وبعدها جاتنا نوف الغامدي: صراحه ينخدعون الناس فيك اكبر دليل ان اداره المدرسه يقولون انها هاديه وكيف يطلع منها الشغب ذا . ..وكمان احس حلو انو الواحد يستشيرها ..كلامها احيانا يكون في محله..وعاد نفس كلام الشله منافقه والله يكفينا شرها هههه وسولفجيه..وسلامتكم وبعدها ارسلت اسماء الهبيلي وقالت: والله ياكشحه مدري وش اكتب فيك...اول ماراح اكتبه تعاملك مع الناس.. صراحه تخدعين الواحد يعننك وياه وانتي غداره ويتخاف منك ياكلبه لاني جربت اشياء كثيره سويتيها وثانيا تدرون اني راسبه في التعبير علشان كذا تأخرت في الرد وزي مايقولون صعب اوصف القمر اقول لاتصدقين.. الشي اللي احبه في وفاء الاستهباااال واو يالاستهبال واكرر اني راسبه في التعبير وإذا ماصدقتو روحو اسئلو ابله مصلحه وابله نوره اللي درسوني في الابتدائي .. بعد اسماء نروح لبشاير الشريف ونشوف وش تقول: اتكلم لكم عن انسانه ملكه الانسانيه بمعانيها.. نظرات عيونها مثل الطفل ببرائته مايخون ..مايدل إلا طريق الصدق مايعرف نفاق ..وطيبه في قلبها تعذب اللي حولها .... بس انها تفرق عدوها ..تمسح من قلبها وتشيل من ذاكرتها كل حقد وحسد...تفكر بغيرها وتشرق عليهم شمس الامل حتى لو كانت مغموره بحزنها وآلامها ..تشفي جروح غيرها حتى لو كانت مجروحه ..تضحك بشفاهها حتى لو كان قلبها مكسور ..ماتتصنع المشاعر حتى تبرهن من تكون ...لاكن قلبها عامر بالمحبه والسلام ..تحب بكل احترام .. تسحر بكبرييائها.....مع انها رقيقه وشفافه وتملك كل الاحساس بداخلها..مارأت مثلها صح تبعد عنا وتتغلى علينا بصوتها بس ماتنسى احد في قلبها ..تخلي الكل قريب منها ...تعلم بس ماتتعلم ..!.. خطيره وذكيه ..ومحد يقدر عليها في مقالبها .. جننتنا بأبتكاراتها وإختراعاتها وبجمال صوتها .. تغامر لاجل تسعدنا .. طيبه بس تعرف عدوها...عنيده ..مثابره يعني ماتستسلم واجتماعيه..-قاطعه بقووه – عند الحكمه والرأي تعرف متى تقرر..وفيه صفه يمكن انا اكثر وحده تشوفها انها تزرع وتشرق بشمس الامل انا امووووت بذا الصفه . وآخر من مسك المايك هيه مزنه الحارثي وتقول: لازم نتكلم عن خياطه شلتنا ~ زي العسل <<لاتخذين في نفسك مقلب شخصيتها اللي يشوفها ومايعرفها يقول عنها هااديه بس عاد إحنا عاجنينها وخابزينها ..شقييه وتجامل اللي ماتعرفهم..تضحك حتى لو ماتعرف السالفه مرحه وخفيفه دم.. .................................................................... هذي شله (رجه بس رزه) اللي اجتمعو من ايام الابتدائي والمتوسط والثانوي وحتى لو فيه أي اختلاف بينهم يبقون بنفس الطباع وبتقارب فضيع بين الشخصيات .. وبحكم اننا لسنا اطوائيين على انفسنا ونحب الاختلاط بالناس تعرفنا على شله (فش فاش) ... ......................................... في وسط لعبنا العنيف ووسط صياحنا المعتاد وضحكنا سكتنا فجئه!!! على صراخ ولعب وجنان وضحك يشبه صراخنا ولعبنا وضحكنا.. بقوه ..!! مييييين تتوقعون؟؟؟ طلعو(شله فش فاش) لفتو نظرنا ولفتنا نظرهم لاننا نتشابه في التصرفات وخاصه لما طلعنا للثانوي سارو كل خمس او اربع بنات من شلتنا في فصل لحالهم وشله ( فش فاش)نفس الحال والاحلى من هذا في اولى ثانوي كنا نجتمع في الاداره سوى على نفس المشاكل مثلا: إذا راحت وحده من الابلات تشتكي في الاداره من البنات وتقول انهم (خلو حصتي كلها مهزله وسواليف) الاداره تطلب منها انها تكتب اسماء البنات اللي زودوها في حصتها بزياده(نلاقي الاسماء نصها شلتنا ونصها الاخر شله فش فاش<<وافق شن طبقه..يعني التشابه اللي بيننا في الرجه والجنان خلانا نقرب من بعض اكثر في البدايه كانو شله (فش فاش)يستغربون من اساليبنا في المزح مع بعض يعني كانو يشوفوننا واحنا ننقسم فريقين ونتضارب بعنف..لما بدؤ يمونون علينا وسرنا نمون عليهم علمناهم المضاربه وسارو هم فريق وإحنا فريق وسرنا نتضارب سوى ونسوي مقالب سوى ..دارت الايام وسرنا احنا وإياهم نعرف بعض زيين ونعرف صفات كل وحده زين ..سرنا نعزم بعض على الفطور في الاختبارات النهائيه يعني نجي صاحبه البيت الساعه 10 او 9 او 11 على حسب مايصرفونا ونفطر سوى ونعين من الله خير ...باختصار صار بيننا خبز وملح .. حتى انهم كانو يجلسون المخطوبات من شلتنا مع المخطوبات من شله (فش فاش) قبل فتره زواجاتهم يعني قبل الصيف وتلاقونهم يسألون بعض عن الخلطات اللي يستخدمونها وعن كل شيء يخطر على بالهم ويتناقشون في مواضيع ماتخص العزابيه <<طبعا كانو العزابيه يسحبون انفسهم من هذي الاجتماعات بانفسهم ويقومون يلعبون ولا يشوفون لهم أي شغله... المهم .. حضرنا زواجات بنات شلتنا وشلتهم (طبعا على حسب ظروفنا يعني غالبا إذا كانت العروسه من شله رجه يكون الحضور اكثر من شله رجه وإذا كانت العروسه من شله فش فاش فيكون الحضور اكثر من شله فش فاش) المهم اننا بعد ما انتهينا من الثانوي سوينا حفله تخرجنا سوى في استراحه وحده ..صح انه كان ينقصنا بعض البنات في الحفله لان وقتها كان في الصيف فبعضهم ضروفهم ماسمحت انهم يجون .. وفقدناهم وتمنينا انهم جو ...لاكن كانت حفله قمه في الروعه... المهم <<نرجع نتكلم عن شله فش فاش .. بصراحه الاغلبيه يسمونها(شله جمانه) احس هذا الاسم هوه اللي احنا ماسكينه عليهم لييييش ؟؟؟ ماندري المهم نبغى نتكلم عن اعضاء الشله بحكم اننا جبنا طاري جمانه فبنتكلم عنها هيه ... جمانه الغامدي: اولا احب اقولكم لايغركم انها غامديه ترى نص كلامها حضري ... المهم نتكلم عن شخصيه جمانه ..حبوبه وبنفس الوقت ملسونه يعني يوم ندخل الاداره واحنا مسوين غلط تخش في عينهم إلا اننا ماسوينا شيء واننا مساكين ..على قوله المديره تقول عندها قوه حجه ههه ..جمانه من النوع اللي يعتمد عليه يعني إذا وكلتيها شيء تتقنه وتقوم به على اكمل وجه .. ترى مو علشانها من شله فش فاش يعني اننا ماعرفناها إلا في الثانوي..جمانه نعرفها من ايام الابتدائي وكانت من ظمن اللي دشرتهم اسماء عبيد في الحاره .. فيه شيء لازم اقوله ..جمانه لاحظنا انها تعجب الحريم بشكل جنوني وغريب ..يعني وجهها وجسمها وشعرها يموتون عليه الحريم ما ادري ايش معنى هيه>>غيرانه خخخ..ام نوف الغامدي شافتها وطاحت مدح فيها..وام سلمى الجعيد تمدحها..وام ندى تمدحها ...الله يكفينا شرها ..

جمانه معنا انا وابتهاج ورباب ونوف الغامدي وخلود الثبيتي في نفس الجامعه ..ترى فضحتنا بضحكتها ضحكتها نوعا ما غجريه ويسمعها إلي في آخر الدنيا ماشاء الله عليها ..بس عاد في الفطور ماتقصر اتذكر يوم دفعت لنا 100 ريال صح انها عصبت يوم مارجعنا لها الحساب وكسرت عطري وسرقت روجي وسرقت عطر ابتهاج ..بس رجعنا اغراضنا باسلوب ومشى الحال..على فكره لايغركم اننا عرفنا شله فش فاش في الثانوي ترى جمانه نذكرها من ايام الابتدائي ولا كيف دشرتها اسماء عبيد مع نوف الغامدي في الحارات ايام الابتدائي بس عاد بعد ماطلعنا المتوسط راحت لمدرسه واحنا لمدرسه ثانيه..ترى ايام الابتدائي كانت جمانه تشارك في الاذاعه طول الايام ماشاء الله عليها وكانت دايما تنشد صح اني كنت انشد معها بس عاد هيه مره ماتفك الاذاعه ماشاء الله عليها..





هذي جمانه ذلحين باتكلم عن شخصيتين مع بعض

خلود النفيعي وابتسام الفيفي:

يمكن تسألوني ليش حطيتهم مع بعض..؟

بصراحه اشكالهم مع بعض قمه الروعه احس انهم مثل الحراميه اللي يجون في افلام الكرتون واحد طويل واحد قصير وداخلين جو مع ضحكهم ومغامراتهم ودايما تلاقيهم مع بعض ماشاء الله عليهم..

زي ماتعرفون ابتسام الفيفي من المجموعه اللي نسميهم اطفال في شله فش فاش بسبب الطول وماشابه ذالك..بس لايغركم ترى فيها صفات حلوه يعني تعرف تطبل ماشاء الله عليها وصوتها لما تغني ياخذ العقل ماشاء الله عليها مو زي العندليبات اللي في شلتنا ..طيب نتكلم عن شخصيه ابتسام ..بسومه مرحه لدرجه الجنون وتجيب نكت تجنن وتقطع البطن ماشاء الله عليها في نفس الوقت تحب التعليق والتريقه وفيها نسبه من الذكاء في اتخاذ قرارتها وفي تفكيرها في الخطط والحلول ماشاء الله عليها ..تعرف تمثل أي دور مثلا (مسكينه-او انها مستغربه من شيء يعننها ماتدري وش سبب حدوثه..الخ)..وتحب الروايات وخاصه روايه(مها وفيصل)اللي جننتني بها وشيبت شعر راسي على طاري الروايات ابتسام من النوع اللي إذا جاء يقنعك عنده اسلوب حلو في الاقناع لاكن مشكلتها تحول الاقناع في آخره إلى اسلوب يسمونه (نشبه-او بالاصح تنشب لك) اتذكر يوم اعجبتها روايه مها وفيصل قالت لي امانه اقريها قلت لها انا عارفتها من زمان حكت لي مها صاحبتي عنها قالت: يعني ماقريتيها بس حكتلك عنها مها .. قلت:ايوه

قالت:لا ترى مو زي لما تقرينها انتي بنفسك اسمعي بكره امانه افتحي النت واقريها..

قلت:مستحيل اقراها وانا عارفه نهايتها وكل شيء فيها.

عاااااد ومن بعد هذي اللحظه..نشبت البنت إلا بتخليني اقراء ذا الروايه وفي يوم من الايام انصدمت انها جابت ذاكره الجوال وحطت فيها الروايه وقالت يالله ذلحين مامعك عذر خذي الذاكره واقرائيها!!

من حسن حظي الذاكره ماتدخل في جوالي...

ولا زالت ناشبه لي إلا بتخليني اقراها وانصدمت انها تقول انها بتسجل في نفس المنتدى إلي انا مسجله فيه علشان تنزلها فيه!!! المهم انتهى الموضوع بنا إلى انا طلبت التدخل من الباشا سيرين وهزئتها على هذا التصرف الصبياني وبعدها خافت ابتسام من سيرين تعرفون الفارق الطولي بينهم ورغم هذا لازالت تحاول ابتسام ان تخليني اقراء هذي الروايه بس بدون ماتدري سيرين...اما عن خلود النفيعي فهي طويله ماشاء الله عليها علشان كذا اشكالهم روعه مع بعض وإذا بنتكلم عن شخصيه خلود فيظهر عليها الصلابه والقوه في الدفاع اما من داخلها فهي على نياتها بقووه وطيوووبه وقلبها كبيييير وبنفس الوقت ترحم الناس وتحبهم..الشيء الثاني انها مرحه وتحب التريقه والضحك من اعماق قلبها <<وعاد اجتمعت هيه وابتسام في هذا الطبع بقوه.

وخلود فيها طبع تأثرت فيه جمانه ..انه لما يتكلم أي شخص مع خلود بجديه وبالاخص إذا كان يهزئها ويطالع في وجهها تضحك في وجه !! <<مدري وش تحس فيه..

المهم ان خلود لما نكون في الاداره او لما نتفاهم مع وحده على مشكله او موضوع تسكت بعدين تجيب كلمه داااااخله عرض واقصد بداخله عرض يعني (تزيد الطين بله) مثلا كنا مسوين بلا والابله قاعده تهزء فينا تنط خلود وتجيب لها كلمه ترررفع بها ضغط الابله200

ويكون غرضها من هذي الكلمه انها تبرر غلطنا قدام الابله المهم ان خلود وابتسام لما يجتمعون مع بعض يكونون ثنائي ضاااحك وايام البرد كانو يلبسون جكيتات طقم مسوين كشخه هم ووجيههم وماعمرهم لبسو سواء إلا وتمسكهم الاداره على مشكلهم سارو يقولون لنا انهم تشائمو من سالفه التطقيم هذي وفعلا المره الاولى لبسو ابيض سوى ومسكتهم الاداره والمره الثانيه جو لابسين اسود سوى وابتسام تقول الله يستر مانلبس سوى إلا ونسوي لنا شيء ويكشفونا شوي إلا الاداره تدورهم.!!

اخاف اني يوم كتبت اسمائهم في الروايه سوى بتجي آخر شيء الشرطه وتلقطهم خخخ

المهم محد يلومني يوم كتبت اسمائهم سوى ابغاكم تشوفون شخصياتهم مع بعض بنظره وحده ..

بعد الثنائي المرح من شله (فش فاش)

نروح لخلود الثبيتي:

خلود الثبيتي اول ماتشوف شكلها بدون ماتجلس معها

تعطيها انها فيلسوفه ..خاصه يوم تقوم تجاوب على الابله في الحصه .. اتذكر اول ماشفتها في اولى ثانوي وشفتها لما تجاوب مع الابله احسب انها قمممه في الشطاره والادب عاد البنت ماشاء الله شعرها طويل وتكون حاطته على قدام يعني حاطه الضفيره على

كتفها ولما تقوم تجاوب ترميه على ورى وتوقف

يعني لاتلوموني هذي حركات وحده فاااهمه بقوه ماشاء الله.... بس لما عرفناها زين البنت تحب الضحك والفرفشه والهيصه .. واحسها تحب تسولف اكثر من ان تلعب ..اتذكر الايام اللي كنا نتضارب الشلتين مع بعض كانت خلود ماتتضارب علشان بشرتها حساسه يعني من أي صقعه تتأثر..

عاد احنا صدقنا ان البنت من جدها بتجلس وماراح تتدخل في أي شيء.. وفي ذاك اليوم كانو شلتها جايبين خلطه يبغون يروشوننا فيها وهيه(نشاره الخشب وبهارات السمك مع بودره اطفال<<شكلهم جايبين بودره ابتسام ونوف الدعجاني الاطفال حقينهم ههه

وبداءت الحرب في ساحه المدرسه وبداءنا نخطف البعض من اغراضهم ونرشها عليهم ونستعين ببعض الاغراض الخارجيه مثل (الماء- والتراب حق احواض الزروع) وهم ماقصرو بعد شادين حيلهم

المهم ان خلود الثبيتي كانت جالسه وما قامت تضارب

وكنا متوقعين انه مارح يجينا منها أي مشكله

بعد الملاحظه والتنقيب لاحظنا انها تعلم شلتها بكل تحركاتنا في الساحه يعني كانت واقفه زي شرطي المرور والله اعلم

عاد احنا مانسوي لها شيء علشان بشرتها اما إذا اكتشفنا انها كانت تكذب علينا عاد مانقول إلا حسبنا الله ونعم الوكيل ههههه بس عادي نقدر نعوض هيه ذلحين معي انا ونوف ورباب وابتهاج وجمانه في نفس الجامعه ..

اللي لاحظته انها ماشاء الله عليها مرتبه يعني احس اغراضها مرتبه ومرصوصه في الشنطه وهيه مرتبه بقوه مقارنتا بباقي اعضاء شلتنا وشلتها لاننا اسم الله علينا نرمي الاغراض في الشنط رمي ...

بعد خلود الثبيتي....نروح لصاحبه الابتسامه الدائمه ماشاء الله عليها

سلمى الجعيد:

قبل كل شيء سلمى هيه اول من اطلقت عليه اسم(فلسطينيه) ومسكوها عليه الشله.. بس ترى ما اطلقت عليه اللقب عن طريق مزح!! بتعرفون السالفه ذلحين...

يقولون فيه نوع من التعارف الجميل مايحدث لك إلا عن طريق مشكله!!

وسلمى من الوجيه إلي عرفتني عليها المشاكل...!!

اما عن شخصيه سلمى ..البنت هذي ماشاء الله عليها احسها بشوشه ومبتسمه 24ساعه وعندها نيه صافيه وقلبها طيب ..

ومرحه تحب الضحك والنطنطه والقفز والركض وجميع انواع الجنان هههه..المهم اننا اول مادخلنا لمدرسه الثانويه حقتنا كنتا متعودين على المتوسطه اللي كنا فيها كانو يحطوننا كلنا في فصل واحد إذا مره قالو بيفرقوننا يقسموننا لفصلين ..اما في الثانوي الحاله غير والدنيا زحمه رمو كل ثلاث او اربع في فصل لحالهم طبعا الحال ماعجبنا في البدايه وماكنا نعرف شله فش فاش

واساسا ماكانت عاجبتنا الثانوي خلقه تعرفون التغير المفاجئ مايعجبنا ..المهم كنا جالسين في فصلنا الجديد انا ومها ونوره الغشمري ونوف الغامدي واسماء الهبيلي وكانو جالسين ورانا شله فش فاش وبعد ماتعرفنا عليهم تعرف سطحي يعني سألونا عن اسامينا وسألناهم عن اساميهم ووين درسو المتوسط وانتهى الموضوع.. قمنا احنا من باب اننا نبغى نرفه عن انفسنا قمنا نغني ونطبل وبعد ماسكتنا دخلت سلمى الجعيد وراحت جلست مع شلتها وقامت تقول لابتسام الفيفي غني لنا أي اغنيه قمنا طبلنا احنا وغنينا

قامت سلمى طالعت فينا وقالت :)بنات لو سمحتو وقفو شويه..) طبعا احنا روووح قلبنا العناد والمشاكل

طنشنا وزودنا في عيار الطبل..شوي إلا سلمى صاحت علينا تقول:(بناااااات اسكتو) عاد انا نفسي براس خشمي زي مايقولون ...بدات اتكلم عليها ووتتكلم عليه وبداءت المشكله بيننا واتذكر ان خلود النفيعي كانت تقول:خلاص يابنات اسكتو ..سلمى خلاص..يعني كانت تهدئ المشكله هيه وصاحباتها المهم بعد ماهدئت المشكله بدات ابتسام تغني لسلمى ورجعنا احنا نطبل ورجعت المشكله من جديد ..شوي واحنا نتمشكل طالعت فيه سلمى بنظرات كره واستحقار وقالتLالحمدلله فلسطينيه وتتكلم!!

عااد ساعتها افنجرنا بالضحك احنا وشلتها وسارت هيه تطالع في صاحباتها وقالو لها:ترى ماهي فلسطينيه..

دارت الايام ولاتسألوني كيف سرنا اصحاب ونحب بعض ونعز على بعض ..اصلا انا مدري ايش جاني اتمشكل مع سلمى لانها كانت مبتسمه والبنت لها قبول بقوووه ماشاء الله عليها لاكن يمكن ساعتها كان ابليس معي وكنت ابغى أي وحده اتمشكل معها ..المهم ان ابتسام سارت مسجله اسمي عندها في الجوال(الفلسطينيه) والسبب من سلمى الله يهديها..

ولازال شبح هذا الاسم اللذي اطلقته سلمى يلاحقني ..

سلمى ذلحين متزوجه ونفس حاله نوره الحارثي كلهم الثنتين حوامل الله يعينهم وييسر لهم .. ..وإن شاء الله نشوف بنت سلمى او ولدها يشبهونها ويجون فله يحبون اللعب والطبل والرقص زي امهم..

بعد سلمى وعالمها اللي كله ضحكات بنروح لعالم ثاني من الضحك بس مع

نوف الدعجاني:

نوف من المجموعه اللي يسمون بالاطفال في شله فش فاش .. اما عن شخصيه نوف فهي مبتسمه ولما تضحك تكون ضحكتها غجريه يعني اللي عنده نكته لايقولها وجمانه ونوف جالسين سوى بيسمع ضحك فوق الطاقه السمعيه ماشاء الله عليهم هههه(تراهم هم اللي اخترقو طبقه الاوزون بصووت ضحكهم ماشاء الله)

البنت هذي مرحه وتحب الضحك والنكت والجنان واحسها تحب الازعاج وتعرف تسويه يعني نفس طبع شلتها بس فيه ملاحظه عليها ..

انها نوعا ما يجب ان يطلق عليها(ابو دميعه2)

لانها بكايه نسبيا .. اتذكر اول ماشفتها في اولى ثانوي البنت مسويه انها رزه وشخصيه وعاد البعض مشى عليهم المقلب وانا من ضمن البعض ..شوي إلا دخلو علينا الابلات وقالو Lفيه تطعيم .. طبعا ما اخفي عليكم كلنا خفنا .. بس عاد اما نوف خربت ابو الشخصيه

نطالع في البنت إلا وتدعس بكاء وعلى بالكم انها نزلت دمعتين وخلاص ..!!

لاااا والله اني اتذكر البنت طولت تبكي وصاحباتها يهدونها ويسكتونها ..وتقولL( لا مأبغى اتطعم)

يعني فيها من حركات تغريد اللي في شلتنا خاصه في البكاء هههه

وعلى فكره اول مابدينا نتضارب مع شله فش فاش

كان اكثر من يوقف في وجيهنا منهم ويضاربنا بحماس وشجاعه (خلود النفيعي وإبتسام وجمانه)

بس بعد فتره من الفترات طلعت لنا نوف الدعجاني وندى سارو يضاربون ويتلقفون على كيف كيفك

يعني في الايام الاخيره بدت نوف تشد حيلها في المضاربات وفعلا كانت تضارب

بس انا ترى عمري ماقلت لها هذا الكلام ولا فكرت اقوله لانه يعتبر تشجيع لها واخاف انها تتشجع وتزودها زياده ..

ونسيت اقول شيء ترى نوف لاحظت فيها انها ماشاء الله من النوع اللي يواصل ومايقطع الناس يعني بعد ماتخرجنا من الثانوي احسها تواصل البنات كلهم سواء بأتصال او رسايل ...

بعد نوف الدعجاني ....بنروح لندى

ندى الزهراني:

هذي البنت اول ماتشوفها تعطيها انها هاديه وانها رقيقه وماتحب المضاربات والمزح الثقيل اللي احنا وشلتهم طايحين فيه...

بس لما تشوفونها في المضاربات شكل ثاااااااني وجنان ثااااني..خاصه في الآونه الاخيره زي ماقلت سابقا انها هيه ونوف الدعجاني سارو يضاربون بشده وياخذون حقهم...اما عن شخصيه ندى فهي ماشاء الله عليها مبتسمه اغلب وقتها واسلوبها في التعامل مع الناس راقي وقمه في الذوق لانها اساسا اجتماعيه هيه واهلها كلهم ماشاء الله عليهم .. وبنفس الوقت عندها قلب طيب ..

هيه ذلحين تعتبر البطه السوداء على قولتهم ..يعني حظها في الكليه لك عليه لان مامعها ولا وحده من شلتها ولا من شلتنا بس بحكم انها إجتماعيه ان شاء الله تكون صداقات وتنبسط..

ملاحظه:

البنت لاحظت في البنت هذي طبعا بعد مالفتت نظري ابتسام وقالت انهم يعلقون عليها شلتها بهذا الشيء..

ان عندها مرض (الحاء)

يعني تضع قبل كل فعل مضارع حرف الحاء مثلا تقول (حننزل او حنطلعاو حتجو ) تقلب مصري في نص كلامها .....

حنتقوز<<حنتزوج بس بالمصري ههههه

على طاري ندى تراها تعرف ترقص غربي بس مشكلتها إذا طلبناها ترقصه ترقص نصه وماتكمل وشلتها لهم محاولات فاشله في تقليدها هههه

بعد ندى

نروح لسلمى الطويرقي

سلمى الطويرقي:

يمكن هذي البنت تعتبر اكثر وحده هادئه في شله فش فاش...

وهي هادئه شكلا وفعلا يعني قلبا وقالبا هههه

طبعا الملاحظ منها انها مبتسمه وهادئه في نفس الوقت

وماتحب تدخل في مضارباتنا الهمجيه إحنا وشلتها

بس اكييييييد كانت تؤيد شلتها وتتمنى لهم الفوز علينا

للأسف رغم ان سلمى طيبه ودايما مع شلتها بس احس انها ما احتكت فينا كثير بس رغم هذا تعرف انها طيوبه وهادئه

......................................................

ذلحين انا ذكرت لكم كل شخصيات الشلتين ويمكن لو تلاحظون انا ما اكتب صفات الشخصيه فقط انا كتبت حتى ابرز المواقف اللي اتذكرها من كل وحده..

وترى لو اقعد اكتب كل مغامراتنا وافكارنا بتطلع الروايه طويله بقوووه ..

..كتبت عن الاشخاص والشخصيات لانني عشقتهم..

..ولم اكتب كل المواقف لاننا لم ولن ننساها..

فالمواقف اكثر من الشخصيات...

░░░░░░░░░░░░░░░░░░░░░░░░

بعد ماقرأنا كل شخصيه بالتفصيل ورغم التشابه اللي بين شخصياتنا إلا ان لكل وحده صفه تميزها وتوضح صفاتنا وافكارنا لما نسير بوسط المواقف..

مثلا....

في يوم من الايام وهوه يوم الاحد بعد مادق جرس انتهاء الفسحه وبدينا نطلع الدرج علشان نروح لفصولنا طبعا بعد مالفينا الاسياب كلها وخلينا الابله اللي عندها النوبه تنقص كيلو او كيلوين...العاده اننا بعد مانهيص نودع بعض ونروح الادبي على فصولهم والعلمي على فصولهم<<(طبعا طريقه التوديع تكون بظربه على الظهر وانتي لافه او بسحبه شعر ونحوه..)

المهم ..وإحنا طالعين من الدرج بدأت تصعد اصوات الشلتين بفكره ليست بجديده وهي الشرده...

اترككم مع البنات..

-←بنات ايش رايكم نطنش الحصه الخامسه ونقعد نسولف في الدرج ونفلها..

-←يللللللعن اووووم الفله..

-←طيب انتو يالادبي مين عليكم؟؟

-←اوووه علينا أدب يعني ماراح تكشفنا..

-←حلوووو واحنا العلمي علينا كيمياء ماراح تدري عنا

(طبعا الشلتين الان في حاله يسمونها اصطناع الذكاء يعني يحسبون انهم اذكياء وماحد بيكشفهم)

بدء الهدووووؤ لان كل الطالبات دخلو فصولهم وبدت الحصه الخامسه..

جلسو الشلتين في الدرج وارتفعت الاصوات..

فوزيه:بنات تخيلو يكشفوننا؟؟<<كالعاده تحب تخوفنا معها!!

البنات باصوات يسمعوناها المدرسه كلهم:يابنت محد درى عنا..

نوف الغامدي:اسمعو إذا مسكونا عادي بنقول اننا كنا رايحين نكلم المديره عن حفله التخرج والله تصريفه

-←بنااات ترى عددنا 18 او 17 يعني مكشوفين مكشوفين بس عاااادي لنا فتره عن الاداره..

-←والله اشكالنا زي اللي يجون هاربين بدون اقامه ههه

وبدأت السوالف وترتفع الضحكات وخاصه ضحكه جمانه ونوف الدعجاني مع لمسات من صياحنا اللي يجي خلقه مع السوالف..

وفجأه...نسكت كلنا على صوووت جاء من اسفل الدرج..

-(يابنت ايش قاعده تسوين انتي وإيها شاردين من الحصه هاه)

عاد بدون مانرد قمنا كلنا وشردنا طبعا بحكم ان الابله اللي نادتنا موجوده في اسفل الدرج فأحنا توجهنا لاعلى الدرج هروبا منها وإذا سرنا فوق يحلها الف حلال..

وفجاءه توقفو البنات عن الركض مع صوت شهقات تدل على الصدمه بالاضافه إلى صوت ازيز او انين الضحكات المكتومه..الوكيله ابله خديجه في اعلى الدرج

يعني كانو محاصريننا...

تم القبض علينا..!!!

عاد في الاداره مافي شيء نقدر نقوله او نبرر فيه بشكتنا اللي سويناها

دخلنا الاداره واصبحت مزدحمه بالشاردين

ابله خديجه:كلكم شاردين؟؟ يعني اللي ماهي وجه دراسه ولاتبغى تدرس ليش جايه المدرسه؟؟

ليش جايه المدرسه<<سؤالهم المعتاد والمحرج

هاه يافلانه ليش جالسين في الدرج ...وانتي يالي ميته على نفسك من الضحك يالله جاوبي

تبغوني انادي المديره تتفاهم معكم وتشوف الوضع اللي انتو فيه؟؟

والله توني متفقه انا وإياها على حفلتكم حقت التخرج بس شكلكم ماتستاهلون..

(طبعا اول ماقالت -حفله التخرج- تذكرنا فكره نوف كلنا)

وتنط فوزيه وتخبص السالفه:ايوه يا ابله انا كنت انا ونوف بنروح نكلم المديره عن الحفله علشان كيذا كنا في الدرج<<يعني احنا كنا موكب لها هيه ونوف خخ

--ارتفعت اصوات الشلتين بالضحك وقلبنا الاداره قهوه

ونوف اول من ضحك

ابله خديجه:ابتسمت وهيه ماسكه ضحكتها ..اكبر دليل انك كذابه انهم كلهم يضحكون وشوفي نوف تضحك بعد.. وبعدين إذا انتي رايحه تكلمين المديره ليش كلهم هذولا معك ؟؟

خلود النفيعي:يا ابله تبغين الصراحه..<<جينا عند صراحه خلود ..

يا ابله انتو تحطون فتره الفسحه قليله واحنا نصنا علمي ونصنا ادبي يعني مايمدينا نسولف مع بعض فنتجمع في الدرج ...!!! ارررررتفعت اصوات ضحكنا .. وهذي عوايد خلود دايما تجيب لنا الطامه بس بأسلوب ...

دخلت ابله عبير الاداره وطالعت فينا بنظرات استغراب مع ابتسامه على جنب ثم استحقار..

ابله خديجه:شوفي يا ابله عبير هذولا البنات كلهم شاردين سوى ولقيناهم جالسين يسولفون في الدرج..الخ

وهم قاعدين يتكلمون في الموضوع

حسيت اسماء الهبيلي تدقني في جنبي بيدها

طالعت فيها..يعني وش تبغين؟؟

اسماء الهبيلي: وفاء ياويلي ويلاه ماعاد استحمل ابغى الحمام!!

انصدمت!!وسرت اضحك واشر للبنات وشرحت لهم الوضع بالاشاره وسرنا نضحك

سيرين:وفاء قولي لاسماء تجي ورى المكتب ذا الفاضي وتسوي فيه اللي تبغى خخخ

طبعا انا فكرت قلت خليني انكب البنت واسوي فيها مقلب ونضحك شوي

وفاء:اسماء ترى عادي قولي لها ابغى الحمام وروحي ترى ماراح تقولك شيء..

بدأت ابله خديجه تهزء البنات وحده وحده

وفي وسط التهزيء

اسمع صوت خافت ينادي(ابله عبير..يا عبير..ابله عبير)

طبعا ابله عبير كانت منسجمه مع تهزيء ابله خديجه وشوي إلا تسمع الصوت اللي يناديها

التفتت لقيتها اسماء الهبيلي مخشوشه بيننا في وسط الزحمه وتاشر لابله عبير تقول لها كلمي ابله خديجه قولي لها اني ابغى الحمام..ابله عبير سارت تضحك ومصدومه

وفي وسط تهزيء ابله خديجه

ابله عبير: معليش يا ابله عبير اسماء الهبيلي تبغى الحمام..

يعني تحسون اسماء داااخله عرض بقووه وهذي عاداتها في الاستهبال..

عاااد احنا ماصدقنا في شيء نضحك عليه ...

طالعت ابله خديجه باستغراب وبضحك وقالت:وين اسماء؟؟ والتفتت في اسماء..قالت :لك خمس دقايق روحي فيها للحمام وارجعي..

شوي دخلت المديره علينا وبداءت تتفلسف وتهزء

طبعا مين تتوقعون خشت في عين المديره؟؟

كالعاده ..جمانه:شوفي يا ابله صح احنا سوينا غلط بس ترى مو قد ماكبرتوه يعني انتي تعرفين المدرسه فيه بنات يسوون اشياء اكبر من كذا ولا دريتو عنهم

المديره:ليه وش شفتي ياجمانه؟؟

جمانه:شوفي في الصرفه البنات كيف في الشارع وعند باب المدرسه كيف يقعدون يغازلو ويضحكو ويتغنجو..

ابتسام الفيفي:تدق خلود النفيعي وتقول ...هههه حلوه يتغنجو..

وعاد كلنا علقنا على (يتغنجو) احسها اعجبتنا...

طاااال الحديث مع جمانه ومع المديره

وكتبونا تعهد كالعاده ومن باب التخويف كتبونا محضر على قولتهم ..ووقفونا حصتين

يعني من بعد الفسحه ما حضرنا إلا حصه وحده

كنا ناوين نشرد عن حصه وحده وربي رزقنا بحصتين ههههه

░░░░░░░░░░░░░░░░░░░░░░░░

في يوم من الايام حسينا ان فينا طرب♫♫

طبعا إحنا نقوم بأي عمل كان فقط لاشباع رغباتنا..

المهم..سحبنا اقرب طاوله وقمنا نطبل ونغني ولما حسينا ان الابله اللي جالسه عند باب الفصل ماقالت لنا شيء

زودنا العيار وفلينها بقوه ..ومن طبل واغاني إلى تصفيق وتصفير شوي وتدخل إيقاعات الغطارف المعتاده..

طبعا شله فش فاش يدقون شوي واحنا ندق شوي

ولو انهم يغلبون شله رجه بس رزه في الدق..

وفي وسط ماكنا طربانين فتحت الابله الاباب ..

ابله (عفاف):بصياااااح وصراخ(بنت انتي وإياها خير إن شاء الله مسوين دقاقات في الفصل ..من جد قله حيا...الخ) قومو يالله وامشو على الاداره...

..الان الجميع يمثل دور البراءه وكأن محد عارف هيه تقصد مين؟؟ وساااااااكتين كلنا

ابله عفاف:يالله ياوفاء انتي ومها ونوف الغامدي ونوره الغشمري واسماء الهبيلي قومو...

نظراتنا في بعض مع ابتسامه اعتراف للمعلمه وابتسامه بيننا بين يعني لاتخافون..

ملااااااااااااحظه:شله فش فاش اول مادخلنا للثانوي ماكنو يكشفونهم كثير لان الغالب على مظهرهم البراءه والله اعلم...المهم انهم لقطونا احنا

دخلت ابله عفاف قبلنا للاداره وقابلت الوكيله

ابله عفاف:فيه هنا دقاقات ازعجونا لقيتهم يدقون ويغنون

-(عاااد احنا متنا من الضحك..اعجبتنا النكته)

دخلنا الاداره ..

-ليش تطبلون وتدقون؟؟

-انتو مو اول مره تجون للاداره؟

-انتو متى بتتعدلون؟

-ترى حتى ابله فلانه وابله فلانه وابله علانه يشتكون منكم!!........الخ (اسئلتهم المعتاده وتفاهمهم المعروف)

انتهت السالفه بتعهد وطلعنا....

اليوم الثاني...ما ادري وش سوتلها مها من بليه

واخذوها الاداره ...عاد الوكيله اللي كانت تنتظر مها ماهي نفسها اللي مسكتنا امس على الطبل ..هذي

ابله خديجه...

ابله خديجه):طبعا بعد ماتفاهمت مع مها في مشكلتها)

ايوه ياست مها سلامات ليش الدق والطبل والاغاني اللي سويتوها امس...؟

مها:(طبعا البنت تورطت لانها لحالها في الاداره)

اصلا احنا ماطبلنا يا ابله...احنا بس غنينا حتى ماغنينا انشدنا اناشيد عاديه يعني ماسوينا شيء وش فيها؟؟

<<كذبه خطييييييره

ابله خديجه:(بابتسامه تكذيب) اهاه بس انشدتو..

-ايش انشدتو يا مها؟؟

مها: (مها في حاله تفكير البنت معلوماتها ضئيله في الاناشيد ولازم تجاوب في اسرع وقت علشان ماتطلع في الصوره كذابه)

-انشدنا –امي نبع الحنان..!!!

<<تصريف فااااااشل للكذبه

ابله خديجه: J(ضحكت ) خلاص روحي يامها..

...عااد لما قالت لنا مها وش سار لها في الاداره وقالت لنا عن انشودتها(امي نبع الحنان) مسكنها عليها..بس مع كثره المشاكل بدينا ننسى من السالفه..

وهكذا استمر نزاعنا مع الطبل والدق ومع الابلات حتى تخرجنا ..كانو يتجاهلوننا بعض الاحيان إذا يئسو من حالتنا ... وفي بعض الاحيان يمسكون نصنا والنص الثاني مايلحقون عليه..وفي اغلب الاحيان يلقطوننا كلنا لانهم سارو عارفيننا هههه

░░░░░░░░░░░░░░░░░░░░░░░░

كثير كانو متوقعين اننا إذا طلعنا للجامعه بنعقل ونسير بنات جامعه زي مايقولون ...طبعا هذي نظريه فاااشله ولم تحدث ابدا...

في يوم من الايام في الجامعه طلعت انا وابتهاج ورباب نشوف للباص عند باب الجامعه طلعنا ومالقيناه ..

رحنا لآخر الشارع اللي فيه باصات المهم اننا ماشفنا باصنا ولا لقيناه..المهم اننا قصدنا نرجع ونقعد عند باب الجامعه مع نوف الغامدي وشروق اخت ابتهاج

واحنا راجعين شفنا شروق ونوف يطالعون عند باب الجامعه وواضح انهم قاعدين يدوروننا قلنا خلينا نستغل الوضع ونندس عن انظارهم <<مسوين اننا خفيفات دم وحقين مقالب..

المهم سرنا نمر من ورى السيارات شوي إلا

ابتهاج تقول:بنات جمس الهيئه!!

وفاء:(طبعا مو مصدقتها) عادي ماسوينا شيء<<طبعا لحد الان مسويه شجاعه ومو بس انا حتى رباب

-المطوع:يالله يابنات الله يعطيكم العافيه إذا مالقيتو باصكم ارجعو ادخلو

(انا ورباب محترمين انفسنا وماشين وسااااكتين وعاد اما الخوف كلنا خايفين)

ابتهاج:(التفتت طالعت في المطوع) وقالت: يمممممه

عاد انا ورباب سحبنا ابتهاج وسرنا نركض احنا وإياها وخاااايفين..

(عاد المطوع لما شافنا خفنا منه وشردنا ..على باله اننا مسوين شيء وخايفين )

المطوع:تعالي تعالي يابنت..

--وااااااااااااااااااااااو ياويلنا

-اشردو معليكم منه..

--بناااات ترى باصنا جاء شوفوه ايش رايكم نروح له..

--لاااا لااا خلينا نروح على الجامعه

المطوع:)بصياااح) تعاااااااااااااااالي

.......

--يممممممه

--بسرعه يابنات ..

عاد التفتنا ورى إلا المطوع سار يلحقنا على رجوله واحنا نشرد طبعا اشكالنا تموووت من الضحك

والمطوع مصر إلا اننا عندنا بلا

انتهت المطارده مع المطوع بدخولنا للكليه مع العلم اننا دخلنا وهوه لازال ورانا وبغى يدخل معنا هههه

بعد خمس دقايق من دخلولنا للكليه وبعد ماتأكدنا ان المطوع راح طلعنا ورحنا لباصنا

وماندري كيف طلع لنا ذا المطوع ؟؟

وكله من ابتهاج هيه اللي شككته فينا وقالت(يمه) من بعدها معاد فكنا على باله معنا شي..

░░░░░░░░░░░░░░░░░░░░░░░░



في يوم من الايام واحنا في الباص عاد تعرفون انواااع

الجنان اللي يسير في الباص خاصه ان باصاتنا حقت المدرسه طووول وعرض ..في وسط سوالفنا ومضارباتنا وضحكنا ..قالت وحده من البنات اللي نعرفهم معرفه سطحيه في الباص اسمها(رهف)

رهف هذي معجبه بوحده اسمها (اروى) ومسويه انها حبيبتها عاد إحنا نعرف اروى لانها معي بنفس الفصل

شوي إلا رهف تقول:يالله بكره عيد ميلاد اروى ولا جهزت لها هديه واليومين هذي مايمديني انزل السوق ولا في احد بينزلني ..(طبعا ملامح وجهها حزينه)

-وفاء(انا): (طلع في راسي اللنبه حقت الافكار ونبض عرق النذاله..) يا رهف عادي انا بكره نازله للسوق وباشتري لك هديه واغلفها واجهزها وانتي اعطيها اروى..

-رهف:الله يسعدك تكفين والله لاعطيك حساب الهديه بس اهم شي اعطي اروى هديه عيد ميلادها..

(جميع اعضاء الشله غلب عليهم السكوت وسارو يطالعوني وهم مستغربين !! ولسان حالهم يقول_والله وفاء سايره مضحيه_خاصه وانهم يعرفون ان حركات الاعجاب هذي مررره ماتدخل مزاجي)

-فوزيه:(تدقني بيدها وتقولي بصوت خافت) بنت من جدك بتجيبين لها الهديه!!

وفاء(انا):معليك انا اوريك وش اجيب لها..؟

فوزيه:ضحكت لانها عرفت تفكيري..

عاد بعد مالفت عنا رهف وقعدت تسولف مع بنات ..

قمت انا وفوزيه وفهمنا الشله فكرتنا الشيطانيه في تدمير حب هذه الفتاه خخخخ

قالو لنا ترى البنت ماهي غبيه ترى رح تفتح الهديه وتشوفها قبل ماتعطيها اروى

قمت ناديت رهف

وفاء(انا):رهف اسمعي تبغين اغلف الهديه ولا لا؟؟

رهف:إلا تكفين غلفيها

وفاء(انا):طيب انا اخاف اغلفها واتعب وبعدين انتي تفتحينها علشان تشوفينها...انتي قولي وش تبغين اجيب لها هديه علشان ماعاد يحتاج تفتحين التغليف

رهف:عادي أي شيء مثلا دب ومعاه أي شيء

وفاء(انا):خلاص اجل اجيب عطر معاه وقبل ما اغلف العطر بابخ من العطر في منديل علشان تشمينه بدون مانخرب التغليف

رهف:ايوه خلاص الله يسعدك..يعني خلاص اعتمد

وفاء(انا):اعتمدي ..

بعد مانزلنا من الباص انا والشله قامو يسالوني

--هاه ايش تجيبين لها؟؟

--اسمعي نحط لها جميع انواع القمايم .ز

--بس انتبهي تفتحه قبل ماتعطي البنت..

(وقعدنا في حاله من الوصايا والاتفاق لحد ماوصلت بيتي)

اليوم الثاني.........

دخلت للباص في الفجر..

فوزيه:ايش الكيس هذا اللي في يدك ؟؟

وفاء(انا):هذي الهديه اللي بنعطيها رهف حقت عيد ميلاد اروى..

اسماء الهبيلي:الله يرجك جايبه الهديه في كيس صيدليه النهدي..

وفاء(انا):ايش اسوي؟؟ قعدت انسق الهديه ونسيت من كيسها وماعاد لقيت كيس هدايا ..

الشله:...المهم المهم ايش جبتي لها..اسمعي ترى بنفك التغليف ونشوفها..

وفاء(انا):جبت كرتون جوال وحطيت فيه جميع القمايم اللي اعرفها حطيت(بقايا اكسسوارت مكسوره-غطا قلم-حتى حبه فش فاش-فيش تلفون-سماعات جوال مقطوعه-صبغه ويلا مخلصه..الخ)

وفوق كرتون الجوال حطيت علبه عطر صغيره فيها فرده شراب سوداء مستخدمه خخخ

عاد المظهر الخارجي زي ماتشوفون مجتهده فيه ..

المهم نادينا البنت هذي وقلنا لها شوفي جبت لك الهديه بس ترى كيسها ماله داعي لاني مالقيت كيس بس عاد انتي صرفي الكيس

قالت:اساسا انا اشتريت لها هديه امس نزلني عمي للسوق واشتريت لها هديه !!

عااااد الشله تورطو كلهم

قلنا لها (طيب خذي الهديتين واعطيها بصراحه تعبنا عليها الهديه ذي)

قالت رهف: ايوه خلاص عادي ...ومشكوره ياوفاء على الهديه

جات الفسحه واحنا نراقب رهف من بعيد وهيه شايله الهديتين ورايحه تعطي اروى هديتها..

سلمت عليها واعطتها هديتها ..♥♥

المهم رحنا احنا والشله قطينا معهم

--سلااااام ياروى حركاااات اليوم عيد ميلادك..

--وبعد رهف جايبه لك هديه

عاد قامو البنات يطبلون ويرقصون على اساس انهم يحتفلون بعيد ميلادها<<مع العلم ان اروى كذابه ماهو عيد ميلادهم ولاشيء بس تبي رهف تجيب لها هديه...

المهم رهف راحت..

نطينا على اروى كلنا

-اروى امااااااااانه اافتحي الهديه نبغى نشولف وش جابت لك <<مسوين اننا نمون..واروى ماجاء في بالها ابدا اننا احنا اللي جبنا الهديه..

اخذت اروى الهديه ..

وبداءت تفتحها ..طالعت في الكرتون لقيته كرتون جوال

وقاعده تقول:يابنات الله يرجها جايبه لي جوال..☺

ولما فتحت علبه الجوال انصدمت !! من القمايم اللي شافتها..

وصديقاتها سارو يضحكون <<وطبعا إحنا نضحك معهم قااااااطين بقوووه

بعد ماشافو الكرتون الاول راحو يفتحون علبه العطر ولقيو الادهى والامر (فرده الشراااب) خخخ

اروى:اخخخخخس ياقليله الحيا مهديتني شراب..!!

ارتفع صياااااااح ضحكنا

وعلى الفور راحو صديقات اروى وجابو العاشقه (رهف) علشان يتفاهمون معها ...ولا زلنا نحن والشله في ضحك متواصل وتعليق مستمر

جات رهف وعيونها طالعه من الصدمه ودها تعرف ليش احنا نضحك؟ وليش اروى وجهها مقلوب؟؟ وليش صاحبات اروى نادوها وهم معصبين؟؟

ولما طالعت في الارض في نفس المكان اللي اروى واقفه فيه لقيته كله قمايم من الهديه يعني هناك علبه عصار حقت صبغه شعر مخلصه وهناك فيش تلفون وهناك بقايا اكسسوارت وفي الوسط فرده شراب سوداء خخخخ

جات رهف وقامت اروى هزئتها وطالعتها بنظرات وراحت ... رهف بدت تستوعب الكلام وفهمت ان البلا من هديتنا..سارت تطالع فينا وإحنا نضحك وتقول طيب يابنات وعيونها كلها دموع

عاد لما طلعنا للفصل شرحنا لاروى الوضع وفهمناها السالفه ..طبعا في البدايه انصدمت من لعانتنا بس بعدين سارت تضحك ...وكلمنا رهف ..عرفو كلهم انه مقلب وانتهى الموضوع ...

هذي الهدايا ولا بلاش هههه

░░░░░░░░░░░░░░░░░░░░░░░░

في يوم من ايام اختبارات ثالث ثانوي الشيقه ..طبعا تعرفون كيف تزيد حاله الضحك والهستيريا ايام الاختبارات ما ادري ليش؟ وتسير الطاقه زايده عندنا يعني ممكن أي فكره تقترحها علينا أي بنت نقوم بتنفيذها ... اساسا إذا علينا اختبار ماده وحده يعني علينا فتره وحده نطلع فيها الساعه 9 او 10 ونص نخطط على فطور عند احد اعضاء الشله مع مناورات عديده مع اهالينا ونشبات مابعدها نشبات لاكن آخر شيء ننفذ اللي في روسنا ..المهم..في يوم من الايام دخلنا للمدرسه لقينا المديره جايبه سلات زي سلات الملابس وحاطه في كل جهه سله !!

طلعت تبغانا نحط الكتب فيها علشان ما احد يرمي الكتب والاوراق ...

بعد ما اختبرنا قمنا نفكر في فكره لاستغلال هذي النعمه

واول شيء طرى على بال الجميع اننا نقلبها ونجرب الطبل عليها ..تم تسليم السلات لشله فش فاش وقامو بالتطبيل على اكمل وجهه فله مابعدها فله ورقص على كيف كيفكم .... طفشنا من الطبل .. وجات الفكره الشيطانيه ..نحط وحده تجلس في السله ونشيلها ونرفعها فوق يعني تشوفون البنت تطير فوق وترجع في السله

بعض اعضاء الشله ماطرحنا عليهم الفكره ابدا

مثل (ساميه) نادينها كانت تتمشى مع نوف الغامدي ولما سرنا نتكلم معها شلنها كلنا مجموعه من عند رجولها ومجموعه من عند يديها وحطيناها في السله وسرنا نطيرها فوووق والبنت تصيح ولا نزلنها إلا لما تعبنا إحنا ههههه

طبعا الحالات هذي اللي تجينا في الاختبارات هزئتنا عليها المديره ..مره جاتنا واحنا نلعب وقالت:ترى باطردكم للحوش الخارجي واقفل عليكم لانكم ازعجتو البنات اللي عندهم فتره ثانيه هم قاعدين يختبرون واصواتكم واصله عندهم..

مامدها ترجع لمكتبها إلا صياحنا وضحكنا واصلها قامت رجعت وقالت لنا يالله اطلعو للحوش الخارجي

طبعا كلنا سرنا نقول :واااااو والله فله ...

-يالله يالله يابنات برى احلى

المديره فتحت الحوش الخارجي وطلعتنا فيه وقفلت..

كملنا لعبنا وبحكم ان الحوش الخارجي فيه تراب سرنا نصب المويه ونلعب بالطين قعدنا نوسخ بعض بالطين كأننا طالعين من مقبره....

للمعلوميه المديره هذي جنناها..

-سبق وان قلت لكم انها دخلت سيارتها للحوش الخارجي واننا رحنا ننسم كفرها ..

-وبعد كانت تطلع اسلاك التلفون والكبيوتر برى الاداره وتشبكها برى ونتسلل إلى عندها ونفصل كل الاسلاك ونشرد لاخر الساحه وبعد دقيقه نكتشف انها طلعت تشوف مين اللي فصلو الاسلاك وماكشفتنا..

-وايام حصار غزه سوت حفل تضامني مع غزه ونبهت البنات انهم لازم يكونون هادين وعاقلين على قولتها وبعد ماانتهى الحفل قمنا قلبنا الدنيا نسوي مظاهرات!!

واخذنا الاغراض اللي سووا فيها الحفل والاعلام وقمنا نلف على المدرسه...وبالروح والدم نفديك ياغزه..

المديره تطالع فينا بحقد وقاعده تحفظنا وحده وحده علشان تمسكنا وإحنا شايفينها ومطنشين ..واتفقنا انها إذا مسكت وحده منا إن تعلم المديره باسماء الشلتين سوى..<<مسوين انتحاريين ...لقطت جمانه وجمانه قامت بالواجب زي ما اتفقنا وعلمت المديره باسمائنا مسكونا وتفاهمو معنا في الاداره كالعاده وقضينا معهم اوقات جميله كالعاده ههه ..

░░░░░░░░░░░░░░░░░░░░░░░░

طبعا تعرفون مواقفنا كثيره بس فيه مواقف حلوه بس قصيره ماراح اوفر شيء باقولها...

مواقف قصيره وسريعه:

-مره كنا نلعب جوى الفصل وقامو الشله يمزحون بمزحهم الثقيل المعتاد .. وفجاءه اتفقو عليه بدون ما ادري وقامو وسحبو رجلي وانا واقفه واخذو جزمتي وقمت انا اطاردهم كاني مجنونه وبدؤ يتناقلونها بينهم وانتهى بهم الامر ان رموها مع شباك الفصل!!

بعد مارموها دخلت علينا المديره طبعا من الاصوات اللي سمعتها في المضاربه ..كلنا شردنا لكراسينا وجلسنا وبدأت المديره تلقي محاظرتها..وانا خايفه انها تقومني او تاخذني معها الاداره وتلاقين بدون جزمه!!

طبعا الفكره خطرت على بال الشله

وفي وسط تهزيء المديره حسيت البنت اللي ورايها تدقني ولما التفت جهتها اعطتني فرده شراب سوداء وقالت شلتك اللي ورى يقولون البسيها علشان لو قومتك ماتلاحظ شرابك البيضاء يمكن الشراب السوداء ماتوضح مع طول مريولك ..طبعا لبستها وبعد ما انتهى التهزيء طلعت المديره وارتحنا

ولما جات الصرفه اخذت جزمتي وعادت المياه لمجاريها ...

--في ملكه سلمى جات حرمه لابسه برقع ورايحه تسأل عن خلود النفيعي... بعدها راحت تخطب خلود النفيعي وراحت تكلم ام خلود..طبعا الشله اللي حاضرين الملكه مسكو خلود تعليق ..وفي آخر المشوار اكتشف من قبل البنات ان الحرمه هذي ماعندها اصلا اولاد وانها كذااابه هههههه... خلود لازالت حاقده على ذا العجوز ودنا نعرف بس ..(وش تحس فيه؟؟

--في يوم من الايام وفي وسط مشاكلنا في الاداره عصبو الاداريات منا والابلات وقامو يبغون يدقون على امهاتنا...لما جو يدورون لرقم بيتي في الاوراق اللي عندهم لقيو اني كاتبه لهم في كل ورقه رقم يختلف عن الرقم الثاني!!

طلع لبيتنا خمسه ارقام <<مسويه بطراانه قدامهم

طبعا الشله سارو يضحكون وانا تهزئت وانحلت المشكله..

--في ثاني ثانوي عصبو الابلات على الفصل اللي احنا فيه وسارو يشتكون منه في الاداره ..آخر شيء قررو انهم يقسمون الفصل لقسمين فصل للاشقياء والمشاغبين وفصل للمؤدبات ..وجات المديره بالورقه وبدأت تقرأء ا ماء البنات اللي بيروحون في فصل المشاغبات..

طبعا كل الشله انتقلو للفصل الجديد ..لاكن انصدمنا ان اسم سيرين ماقالوه وانهم حاطينها في فصل المؤدبات!!

يافرحه ماتمت..

طبعا الكلام هذا مايمشي عند سيرين ....راحت وكلمت الوكيله وقالت لها انا ابغى اروح في فصل المشاغبات!!

طبعا انصدمت في البدايه الوكيله ودخلت المديره في الموضوع وسيرين لازالت تتفاهم معهم ونشبت لهم لحد ماجبوها معنا خخخخ

--في الحفلات اللي يسوونها المدرسه يكرمون في آخر الحفل مجموعه من الطالبات طبعا لما تقوم الطالبه تستلم هديتها صاحباتها يقطعون الدنيا تصفيق ..ابتهاج استغلت النقطه هذي وسارو اول ماينطقون اسم الطالبه اللي بيكرمونها في المايك تنط ابتهاج وتوقف وعاد احنا نلعب الدور معها نسير نصفق ونصفر طبعا الابلات مستغربين وبعضهم يمشي عليهم المقلب وماينتبهون للاسماء ..في آخر المسرحيه اللي تسويها ابتهاج تسوي كأنها قامت تصلح مريولها وتجلس خخخخ اكثر من مره تسويها بس ترى تضبطها ماشاء الله عليها..

░░░░░░░░░░░░░░░░░░░░░░░░

طبعا مع الحوسه والدوسه اللي نسويها في حياتنا نحتك في ناس بعضهم يحبوننا وبعضهم ماودهم انهم عرفو وجيهنا ههه

شخصيات احتكينا فيها:

-زهور الفيفي وحصه الدعجاني:

زهور هيه اخت ابتسام الفيفي وحصه هيه اخت نوف الدعجاني..البنتين هذولا فلللله كنا لما نروح نفطر مع بعض كانو يفطرون معنا ونص ذكرياتنا كانو يشاركوننا فيها ..

زهور<<انسانه قمممه الطيبه دايما نتريق عليها انها صغيره زي اختها ..وفي نفس الوقت احسها عاطفيه نوعا ما ..واللي في قلبها على لسانها

حصه<<مرحه وبنفس الوقت احس انها انسانه يعتمد عليها واتذكر اننا لما كنا نحضر بعض المحاضرات اللي يسوونها في قصور الافراح كانت مشتركه معهم هناك وكنا نطقها سوالف من اول ماندخل للمحاضره لحد مانطلع وطبعا حصه ترجنا (يابنات اسكتو يابنات اسكتو,.. بس ترى حتى احنا فشلنها من المشرفات اللي قايمين على المحاضره هههه

........................

ام الخير: هذي المدرسه درستنا في المتوسط وسبق وان قلت لكم اننا خفنا ندخل النار بسببها ...كل الابلات اللي درسونا جنناهم بس ابله ام الخير غيييييير...

وبحكم انها حضريه وواضح انها ماتعرف نص كلامنا يعني تخيلو ان نوف الغامدي وفوزيه جابو فكره يقولون بنقول لها(عقبي)ونشوف تفهمها ولا لا وراحو قالو لها

عقبي!! والابله فهمت من حركه اصبعهم على فمهم انها تعني اسكتي..سارت تطالع فيهم وتقول:اييييش؟؟؟

مو بس كذا اتذكر ان أي شي يطري على بالنا نسويه فيها وخاصه وانها عصبيه وتكثر تهزيء يعني معها نقدر نضيع الحصه بسهوله..بس للامانه كانت هذي الابله طيبه وقلبها ابيض وتطالع للناس على انهم بريئين بس إحنا اللي فتحنا عيونها للعانه..في آخر السنه رحنا لها واعتذرنا لها على كل شيء سوينا ..وانصدمنا انها قالت لنا ..انتو ايش سويتو؟؟؟ اصلا انا مسامحتكم!!

......................................

عبد الستار:

هذا سواق افغاني ميسور الحال..لحيته لحد عند سرته ماشاء الله وهذا اللي خلانا نرتاح له..طبعا اكثر من استخدمه شله فش فاش ...نص المشاوير يعتمدون عليه فيها وطبعا من ضمنها مشاوير الفطور اللي نسويها لان شله فش فاش ماهم معنا في نفس الحاره ..ويستخدم ايضا إذا فاتنا الباص احيانا..باختصار هذا يعتبر من انواع الطواري

..................................................

ابصر:

هذا مثل حال عبد الستار بس هذا سواق تكسي هندي

لاكن هذا السواق حديث الولاده اوووه اقصد حديث الاكتشاف يعني هذا السواق نفعنا في الجامعه يجيب لنا الغداء احيانا ويجيب لنا الفطور وتراه سار يعرف حتى انظمه الجامعه وانهم يمنعون دخول الاطعمه من برى

........................................

ابله خديجه:

طبعا سبق وان قلت لكم يمكن عن هذي الابله طبعا هذي هيه وكيله مدرسه الثانويه اللي درسنا فيها هذي الوكيله على انها مسويه للبنات رعب ومسويه شخصيه إلا اننا إذا ماجيناها في الاداره تفقدنا وبشده لاننا كل شويه جايينها بمصيبه ...طبعا ماجاء آخر سنه لنا في الثانوي إلا هيه سارت عارفتنا وحده وحده وعارفه شخصياتنا بالتفصيل وكل عمل سئ نقوم به عندها تفاصيله ههه

في آخر يوم لنا في المدرسه رحنا وتأسفنا منها وتوادعنا منها ..وقامت تقول لنا:(إن شاء الله إذا طلعتو للجامعه تعقلون..)

قامت ابتهاج تقول:(لا إن شاء الله..

..................................

حمد:

هذا سواق الباص الكبير الاصفر جنناه على شيء اسمه ابواب يعني هوه يفتح لنا باب الباص في الصباح علشان ننزل ولما ننزل نسكره ورانا وإحنا عارفين انو فيه بنات باقي يبغون ينزلون ...وإذا تعرفون الباصات الصفراء في آخرها باب للطواري هذا الباب نفتحه كل شويه حتى وهوه يمشي نفتح الباب وعاد هوه يقوم يصيح ويوقف الباص آخر شي قفله بعلاقه ملابس حديد وفتحناه هههه

حتى اعتقد اني قلت لكم اننا طرطعنا في وسط الباص

وقعد هذا السواق يتحملنا لحد ماجابو لنا الباصات الجديده اللي كملنا فيها باقي ذكرياتنا وهيه باصات الامين..لحد الان كل مانمر من عندها او من عند الباصات الصفراء نتذكر جناننا ...

........................................

وآخر شيء بأقول لكم حال كل وحده فينا الان:

إبتهاج الشهري ,,ووفاء الشهري ورباب الحارثي

ونوف الغامدي وخلود الثبيتي وجمانه الغامدي<<في كليه العلوم الماليه قسم اداره اعمال بس دبلوم وجمانه وخلود باكليريوس وبحكم ان شروق اخت ابتهاج في نفس القسم بس باكليورس ولحقو عليها على آخر سنه ومن بعدها ماعاد شافت الخير ويكفي انهم اخذو نفس السواق اللي هيه معه وسرى ليل المشاكل هههه

اسماء الهبيلي<<ناااويه الكليه التقنيه وإن شاء الله تنقبل فيها وهي الحين في البيت مادخلت للكليه ومافي زواج ولا ملكه إلا تحضرها وخاصه الزيارات اللي يخططون لها الشله ههه

مها الحارثي ونوف الدعجاني وساميه المالكي

واسماء عبيد<< في جامعه قروى ولازالو احيانا إذا سمحت الضروف يزورون باقي اعضاء الشله في كلياتهم ..

فوزيه الحارثي ونوره الغشمري وتغريد العصيمي وخلود النفيعي وابتسام الفيفي <<في كليه الفيصليه واكثر من يقوم بزيارتهم جمانه الغامدي لوجود اخت زوجها هناك ههههه

ندى الزهراني<<قسم رياض اطفال في كليه الردف

وبحكم ان نجود اخت وفاء هناك فأحيانا تسلم عليها وتوصل لها سلامنا..

سيرين المالكي<<متزوجه وساكنه في جده ورغم انها في جده واحنا في الطايف إلا اننا نتواصل وهيه تجينا وللمعلوميه زوجها زي جناننها يعني شكل عيالهم بيجون مجااااانين

نوره الحارثي:

متزوجه وساكنه في الحفر ولازالت بنفس الجنان وهيه ذلحين حامل الله يوفقها..وقامت بزياره لنا في كليتنا

وإن شاء الله تعيدها..

سلمى الجعيد<<متزوجه وساكنه في الطايف درست دبلوم في الجامعه بعدين سحبت وماكملت وذلحين تقول انها بتروح معنا في كليه العلوم الماليه إن شاء الله..

بشاير الشريف<<ماكملت الجامعه بس اصلا هيه على وجه زواج إن شاء الله نحضر زواجها والله يوفقها وتراها تواااصل بشكل جنوني الله يسعدها..

مزنه الحارثي <<تقول انها بتسجل في الكليه معنا وطبعا مزنه يومها بسنه شكلها تنتظر العميده تجي تحلف عليها تسجل هههه على العموم رجعت من ديرتهم وسارو ساكنين في الطايف وفي نفس حي الشله ..

صباح الحارثي<<متزوجه وساكنه في الباحه وتقريبا هيه اكثر وحده سارت بعيده عنا ..

سلمى الطويرقي<<في الكليه ولازالت تواصل صاحباتها..

..........................................................................................................................................



رغم اني تكلمت عن كل شخصيات الشله .. وذكرت اغلب المواقف إلي اتذكرها...وحاولت اني اشرح كل شيء اعرفه عن كل وحده ...

إلا اني احس اني ماكفيت ووفيت..ولا ذكرت كل شيء عن صداقتنا ..وعن الايام اللي عشناها ..

من اروع العلاقات في الحياه...علاقه الصداقه

وكل اللي ماجربو طعم الصداقه الحقيقيه ..

اعتبرهم ماعاشو!!!

إلي مالقو صديقات يعدونهم مثل الاخوات..

يدعون ربي انه يعوضهم عن هذي النعمه اللي انحرمو منها ولا عاشو لحظات..

وكل اللي عاشو اللي عشناه انا وصديقاتي ولقيو لهم اخوات لم تلدهم امهاتهم ...

يحمدون ربهم.

..........................................

ومو كل من ماشيناه يعتبر صاحب..

الاصحاب بالمواقف ..والمواقف يبي لها اصحاب..

.................................................

مرت ساعات الزمن سريعا ...وكنا نكبر مع كل ساعه

دون ان نشعر....

عشنا الطفوله معا ..وودعنا الطفوله معا..

فنشئنا في فتره الشباب بنفس الطباع ..

رسمنا للحياه طريق جديد..بعيد عن الخيانه والبعد والتنكيد.

عشقنا الصداقه فعشقت الصداقه وفائنا .. فأصبحنا قصه للوفاء تروى

وقد لاتصدق من روعه ملامحها...

...........○○○○○○..........

وبعد ان رمينا قلوبنا لبعضنا رهينه ..

وذكراياتنا جعلناها امانه ...

لكي لاتنسى واحده منا ايامنا..

بضحكاتنا معا واحزاننا ومواساتنا..ولعبنا وازعاجنا..

.........

تلك ايام وانقضت ..

ولازال العمر امامنا ..لنعيش لحظات مثل اللحظات التي مضت ...

وسنعود لنرويها ..

لتسطر مع حكايات الزمان...







واخيرا ...

بعد ماكتبت هذي الكلمات اللي اخذت من وقتي الكثير

وهذي الروايه من اولها لاخرها وبمقدماتها وخاتماتها

مجهود خاااااص مني ...

قلت استفيد من جلستي قدام الكمبيوتر بالساعات واسوي أي شيء للشله ولاغلى صديقات عرفتهم وانا بذلت كل اللي اقدر عليه في هذي الروايه واكبر سعاده لي اني انا راضيه تمام الرضاء عن هذا المجهود اللي قمت به

يعني بالعربي اشكر نفسي خخخ....



اتمنى ان تكون هذه الروايه نالت على إعجابكم

وان تكون كلماتها خاطبت احاسيسكم..

وبسماتها نالت على إعجابكم..



مع خالص تحياتي وحبي:

وفاءالشهري

‏ليست هناك تعليقات:

إرسال تعليق